Innlent | mbl | 8.10.2020 | 10:01 | Uppfært 10:24

Aðgerðir sem skapi 5-7.000 störf

Logi Einarsson, formaður Samfylkingarinnar, kynnir áætlunina í Hannesarholti í morgun. mbl.is/Kristinn Magnússon

Samfylkingin vill ráðast í stórtækar aðgerðir til að fjölga störfum bæði hjá hinu opinbera og í einkageiranum. Flokkurinn kynnti í dag áætlun efnahagsstefnu sína fyrir næsta ár, sem ber nafnið Ábyrga leiðin.

Með henni er stefnt að því að skapa um 5-7.000 ný störf og minnka þannig atvinnuleysi um allt að þriðjung. Verðmiðinn er sagður 80 milljarðar króna, en að teknu tilliti til aukinna skatttekna og lægri útgjalda til atvinnuleysistrygginga yrði nettókostnaður ríkissjóðs um 50 milljarðar króna.

Ágúst Ólafur Ágústsson, þingmaður Samfylkingarinnar, sagði að í fjármálaáætlun ríkisstjórnarinnar, sem kynnt var í síðustu viku, væru engar aðgerðir til að draga úr atvinnuleysi og fyrirséð værri að um 30 þúsund manns yrðu atvinnulaus um áramót.

Flokkurinn vill ráðast í atvinnuskapandi skattalækkanir fyrir einstaklinga og smærri fyrirtæki, samhliða því að hækka bætur atvinnuleysis- og almannatrygginga og létta undir með sveitarfélögum.

Oddný G. Harðardóttir, þingflokksformaður Samfylkingarinnar, sagði of háar skerðingar í almannatryggingakerfinu, meðal annars á barnabótum, geta fest fólk í fátækragildru. mbl.is/Kristinn Magnússon

Lagt er til að fyrirtækjum verði veittur 2 milljóna afsláttur af tryggingagjaldi á næsta ári. Með því félli gjaldið í raun niður hjá einyrkjum og smáfyrirtækjum. Gjaldið er nú 6,35% en lækkar að óbreyttu niður í 6,10% um áramót.
Vinnumálastofnun verði heimilt að greiða atvinnurekanda ráðningarstyrk sem nemur 75 prósentum af grunnatvinnuleysisbótum til sex mánaða, þegar ráðinn er atvinnuleitandi sem hefur verið að minnsta kosti þrjá mánuði á atvinnuleysisskrá. Hafi atvinnuleitandi verði meira en sex mánuði á skrá verði heimilt að greiða ráðningarstyrk sem nemur 100 prósentum af grunnatvinnuleysisbótum til níu mánaða.
Jaðarskattar barnafólks verði lækkaðir með því að draga úr vinnuletjandi skerðingum barnabóta. Barnabætur skerðast nú við 325.000 króna meðaltekjur foreldra og er skerðingin svo brött að foreldrar með meðaltekjur fá engar barnabætur. Leggur Samfylkingin til að bótaskerðingar hefjist ekki fyrr en við meðaltekjur.
Frítekjumark öryrkja verði hækkað úr 110 þúsund krónum í 200 þúsund krónur

Ágúst Ólafur Ágústsson, þingmaður Samfylkingarinnar, segir höfuðverkefni stjórnvalda vera að takast á við sögulegar atvinnuleysistölur. mbl.is/Kristinn Magnússon

Fleiri störf í almannaþjónustu

Í áætluninni er einnig lagt til að starfsmönnum í almannaþjónustu verði fjölgað. Fram kom í máli Loga Einarssonar, formanns Samfylkingarinnar, að stöðugildum hjá ríkinu hefði fækkað um 1.000 á síðustu tíu árum, á sama tíma og landsmönnum hefur fjölgað um 50.000.

Á sama tíma og um 1.000 menntaðir hjúkrunarfræðingar starfi við annað en hjúkrun vanti um 200 sjúkraliða og 400 hjúkrunarfræðinga á heilbrigðisstofnanir um allt land. Ráðast þurfi í markvissar aðgerðir til að kraftar þeirra nýtist í íslenska heilbrigðiskerfinu. Þá þurfi að fjölga lögregluþjónum um 200 og starfsfólki í menntakerfinu um að minnsta kosti 300, auk þess að fjölga sálfræðingum og félagsráðgjöfum.

Enn fremur er lagt til að grunnatvinnuleysisbætur verði hækkaðar úr 289 þúsund krónum á mánuði upp í 318 þúsund krónur en við það yrðu bæturnar um 95% af lágmarkslaunum. Þá þurfi að tryggja stúdentum rétt til atvinnuleysisbóta í námshléum á sumrin.