Væri ekki ráðherra ef ekki væri fyrir framsýnt fólk

Katrín Jakobsdóttir forsætisráðherra segir að ekki megi missa sjónar á upphaflegum sjónarmiðum fæðingarorlofslaganna sem sett voru árið 2000. Fæðingarorlof verði að tryggja jafna atvinnuþátttöku karla og kvenna og jafnan rétt þeirra til samvista með barni.

Frétt af mbl.is

Sex mánuðir á hvort foreldri

Drög að frumvarpi um lengingu fæðingarorlofs í tólf mánuði voru kynnt í samráðsgátt stjórnvalda í síðasta mánuði. Í drögunum er lagt til að hvort foreldri fái sex mánuði í sinn hlut, en þó að færa megi einn mánuð á milli foreldra.

Í gamla kerfinu, þar sem fæðingarorlof var níu mánuðir, fékk hvort foreldri hins vegar þrjá mánuði í sinn hlut en höfðu  þrjá mánuði til að ráðstafa sín á milli eftir eigin hentisemi. 

Ekki bólar mikið á andstöðu við fyrirætlanir um lengingu orlofsins, en sitt sýnist þó hverjum um þá hugmynd að eyrnamerkja orlofið með þeim hætti sem gert er í frumvarpinu og draga þar með úr frelsi foreldra til að ráðstafa því eftir eigin hentisemi. 

Frétt af mbl.is

Hentar hálauna- og forréttindafólki vel

„Ég tel að þessi lending sem lögð er til í samráðsgáttinni geti verið góð,“ segir Katrín. Sú sýn að reyna að tryggja sem jafnasta þátttöku mæðra og feðra í orlofinu hafi skilað mestu atvinnuþátttöku kvenna í heiminum og Íslandi í fremstu röð er kemur að jafnrétti kynjanna.

Fæðingarorlof verður lengt í tólf mánuði um áramót. Skipting tímabilsins milli foreldra virðist umdeildari. mbl.is/Eggert Jóhannesson

Aðstæður geti verið ólíkar

„Ég gæti mjög vel lifað með þessari tillögu,“ segir Katrín, en þó má skilja á orðum hennar að drögin gætu tekið breytingum. Frumvarpið, sem er á borði félagsmálaráðherra, hefur enda ekki enn verið lagt fram. Í stefnuræðu sinni á Alþingi fyrr í mánuðinum sagði Katrín að Alþingi myndi í vetur „glíma við hvernig staðið skuli að skiptingu þess milli foreldra“.

Spurð út í það sjónarmið að eyrnamerking orlofsins milli foreldra geti orðið til þess að mánuðum teknum í fæðingarorlof fækki, þar sem feður taka gjarnan minna fæðingarorlof en mæður, segir Katrín að hún hafi skilning á því að aðstæður fólks geti verið ólíkar. „Ég hef sjálf tekið fæðingarorlof þrisvar á ævinni og skiptingin hefur verið misjöfn mili mín og mannsins míns eftir aðstæðum í lífi okkar,“ segir hún.

„En ég get fullyrt það að ég væri ekki forsætisráðherra ef framsýnt fólk hefði ekki sett í lög fæðingarorlof sem miðar að því að jafna atvinnuþátttöku kynjanna.“ 

• Blogga um frétt