Ættum að vera hærri en tölurnar sýna

Eins og fram kom í umfjöllun Morgunblaðsins í gær um ónýtt tækifæri í upplýsinga- og fjarskiptatækniiðnaði eru Íslendingar miklir eftirbátar nágrannaþjóðanna þegar kemur að einkaleyfum í iðnaðinum.

Í nýútkominni greiningu Samtaka iðnaðarins segir að ástæðuna megi að einhverju leyti rekja til lítillar hlutdeildar fólks með STEM-færni (menntun í vísindum, tækni, verkfræði og stærðfræði ) á íslenskum vinnumarkaði en Ísland rekur þar lestina í hópi OECD-landa.

Í áframhaldandi umfjöllun um þessi mál í Morgunblaðinu í dag segir Árni Sigurjónsson, formaður Samtaka iðnaðarins, að einkaleyfaskráning þurfi að fá meiri fókus í atvinnulífinu, sem haldist í hendur við uppbyggingu fjórðu stoðarinnar í íslensku hagkerfi, þ.e. útflutningsstoðar sem byggist á hugviti og nýsköpun. Aðrir grunnatvinnuvegir á Íslandi séu í minni mæli í einkaleyfadrifinni starfsemi, en þar á Árni við stoðirnar þrjár; sjávarútveg, orku- og ferðaiðnað.