Innlent | mbl | 10.11.2020 | 10:54 | Uppfært 11:35

11 smit innanlands – 6 í sóttkví

Á Íslandi hefur þeim fækkað hratt undanfarna daga sem eru í einangrun. Myndin er úr safni AFP af hjúkrunarfræðingi sem er einangrun vegna Covid-19 smits á Spáni. AFP

Alls greindust 11 kórónuveirusmit innanlands í gær. Á sjúkrahúsi eru 70 sjúklingar vegna Covid-19 og þar af eru þrír á gjörgæslu. Í einangrun eru 564 og hefur fækkað umtalsvert en í gær voru þeir 621. Ekki hafa verið svo fáir í einangrun á Íslandi síðan um mánaðamótin september/október.

Alls eru 1.076 í sóttkví og 1.019 eru í skimunarsóttkví.

Af þeim sem greinst hafa með Covid-19 á Íslandi eru 24 látnir.

Miðað við 100 þúsund íbúa eru 129 smit innanlands síðustu tvær vikurnar en 13,9 á landamærunum á sama tímabili.

Tíu þeirra sem greindust með Covid-19 í gær fóru í einkennaskimun en eitt smit var greint í sóttkvíar- eða handahófsgreiningu. Við landamærin er eitt smit sem bíður mótefnamælingar en í gær voru sjö smit greind við landamærin.

Af þeim sem greindust í gær voru sex í sóttkví eða 54,55% en fimm voru utan sóttkvíar. 1.265 sýni voru tekin innanlands í gær og 329 við landamærin.

86 börn með Covid-19

Fimm börn yngri en eins árs eru í einangrun, 12 börn á aldrinum 1-5 ára eru í einangrun og 45 börn 6-12 ára. 24 börn á aldrinum 13-17 ára eru með Covid-19 í dag. Alls eru því 86 börn smituð af Covid-19 þessa stundina.

Í aldurshópnum 18-29 ára eru 104 smit, á fertugsaldri eru smitin nú 61 talsins en í aldurshópnum 40-49 eru 78 smit. Á sextugsaldri eru 72 með Covid og á sjötugsaldri eru þeir 79 talsins. 37 eru með Covid á aldrinum 70-79 ára, 34 á níræðisaldri og 18 einstaklingar yfir nírætt eru með veiruna að því er fram kemur á covid.is.

Á höfuðborgarsvæðinu eru 366 í einangrun og 670 eru í sóttkví. Á Suðurnesjum eru 25 smitaðir en 66 í sóttkví. Á Suðurlandi eru 42 smit en 39 í sóttkví. Á Austurlandi er ekkert smit og og enginn í sóttkví. Á Norðurlandi eystra eru 108 smit og 175 í sóttkví. Á Norðvesturlandi eru átta smit og einn í sóttkví. Á Vestfjörðum eru tvö smit og sex í sóttkví og á Vesturlandi eru 17 smit og 111 í sóttkví. Óstaðsettir í hús er eitt smit og átta í sóttkví.