Borgin sendi fjárfestum tóninn

„Þeir aðilar sem höfðu íhugað að koma með fjármagn inn í borgina fengu þarna mjög neikvæð skilaboð. Borgin ætti að vera að leita að tækifærum, en ekki skella á þegar síminn hringir,“ segir Eyþór Arnalds, oddviti Sjálfstæðisflokksins í Reykjavík, spurður um viðbrögð Kristínar Soffíu Jónsdóttur, stjórnarformanns Faxaflóahafna og borgarfulltrúa Samfylkingar, við áformum um hóteluppbyggingu á Miðbakkanum í Reykjavík. 

Frétt af mbl.is

Eins og að segjast byggja hús á lóð nágrannans

Morgunblaðið greindi frá því í gær að malasíski kaupsýslumaðurinn Tan Sri Vincent Tan hefði tryggt sér 40 milljarða króna fjármögnun til að hefjast handa við uppbyggingu fimm stjörnu lúxushótels á svæðinu. Lóðin á Miðbakkanum er þó ekki eingöngu í eigu Tans heldur einnig í eigu hafnarinnar. 

Frétt af mbl.is

40 milljarða fjármögnun tryggð

Viðbrögðin lýsa vanstillingu

Aðspurður segir Eyþór að viðbrögð borgarinnar við hugmyndinni hafi lýst vanstillingu. Þá sé undarlegt að reyna ekki að vinna málið áfram. „Það á að taka stórum hugmyndum vel og taka samtalið við þá sem vilja koma með fjármagn á erfiðum tímum. Það er aldrei gott að senda fjárfestum tóninn, hvorki gagnvart þeim sjálfum né öðrum. Í framhaldinu er hægt að skoða útfærsluna,“ segir Eyþór sem kveðst jákvæður fyrir uppbyggingu á svæðinu. 

„Ég held að það sé raunhæft að byggja á reitnum, en það er spurning hversu mikið og hvernig útfærslan er. Þetta er gríðarleg innspýting inn í kerfið sem er mikilvægt enda verður borgin ekki endurreist með skuldasöfnun. Borgin á að senda frá sér þau skilaboð að hún sé opin fyrir tækifærum.“

• Blogga um frétt