Ein Lyklafellslína í stað tveggja öflugri

Í nýju umhverfismati fyrir lagningu og niðurrifi háspennulína á höfuðborgarsvæðinu er aðeins gert ráð fyrir einni 220 kílóvolta Lyklafellslínu en ekki tveimur mun öflugri línum.

Hins vegar er áfram gert ráð fyrir tilfærslu línumannvirkja fjær byggð á höfuðborgarsvæðinu og niðurrifi gamalla lína sem liggja í eða við byggðina.

Lengi hafa verið til skoðunar breytingar á flutningskerfi raforku í nágrenni höfuðborgarsvæðisins. Þær felast í gerð nýrra raflína og niðurrifi annarra. Gert var umhverfismat á suðvesturlínum. Forsendur þess voru að geta brugðist við spurn eftir aukinni flutningsgetu raforku í tengslum við áætlanir sem þá voru uppi um uppbyggingu virkjana og stóriðju á suðvesturhorni landsins og hins vegar tilfærslu flutningsmannvirkja frá byggðinni.

Gert var ráð fyrir byggingu Lyklafellslínu frá fyrirhuguðu tengivirki við Lyklafell að Straumsvík og Ísallínu 3 frá tengivirkinu við Hamranes að Straumsvík. Þær voru forsendur þess að hægt væri að taka niður Hamraneslínur 1 og 2 sem liggja frá Geithálsi að Hamranesi og Ísallínur 1 og 2 sem liggja að álverinu. Gert var ráð fyrir að Lyklafellslína yrði 400 kV og auk hennar kæmi önnur 400 kV lína samhliða og þær áttu að liggja meðfram Búrfellslínu 3.