Innlent | mbl | 17.11.2020 | 18:26 | Uppfært 20:40

Helstu sóttvarnareglur í leik- og grunnskólum

Kennari og nemendur i Réttarholtsskóla með grímur fyrr í mánuðinum. mbl.is/Eggert Jóhannesson

Mennta- og menningarmálaráðuneytið hefur sent frá sér tilkynningu vegna nýrrar reglugerðar sem tekur gildi á morgun um að nemendur í fimmta til sjöunda bekk grunnskóla séu undanþegnir grímuskyldu og tveggja metra nálægðartakmörkunum, líkt og yngri börn í grunnskóla og leikskólabörn.

Frétt af mbl.is

Grímuskylda barna í 5. - 7. bekk afnumin

Grímuskylda kennara gagnvart börnum á leikskólaaldri og nemendum í 1.-7. bekk er einnig afnumin. Þá er heimilt að nemendahópar blandist á útisvæðum leik- og grunnskóla. Íþrótta-, æskulýðs- og tómstundastarf barna í leik- og grunnskólum verður einnig heimilað. Heilbrigðisráðherra hefur ákveðið þetta í samræmi við tillögur sóttvarnalæknis og í samráði við mennta- og menningarmálaráðuneytið.

Helstu reglur í leikskólum:

- Fullorðnir þurfa að gæta að tveggja metra nálægðartakmörkum. Sé ekki unnt að tryggja tveggja metra nálægðartakmörkun milli starfsfólks skal notast við andlitsgrímur.

- Starfsfólki ber ekki skylda til að nota andlitsgrímur í samskiptum við leikskólabörn.

- Ekki skulu vera fleiri en 10 fullorðnir einstaklingar í hverju rými, þó er starfsmönnum heimilt að fara milli hópa.

- Ekki skulu vera fleiri en 50 leikskólabörn í hverju rými. Nálægðartakmörkun tekur ekki til barna á leikskólaaldri.

- Ákvæði um blöndun hópa, grímuskyldu og nálægðartakmörkun gilda ekki á útisvæðum leikskóla.

- Skipulagt íþrótta-, æskulýðs- og tómstundastarf barna á leikskólaaldri er heimilt, þó að hámarki 50 börn saman. Ekki þarf að halda sömu hópaskiptingu og í leikskólastarfi.

Helstu reglur í grunnskólum:

- Starfsfólk og nemendur í 8.–10. bekk þurfa að gæta að tveggja metra nálægðartakmörkum. Sé ekki unnt að tryggja lágmarksfjarlægð skal það notast við andlitsgrímur.

- Starfsfólki ber ekki skylda til að nota andlitsgrímur í samskiptum við nemendur í 1.–7. bekk.

- Ekki skulu vera fleiri en 10 starfsmenn í hverju rými, þó er starfsmönnum heimilt að fara milli hópa.

- Nemendur í 1.–7. bekk eru undanþegnir tveggja metra nálægðartakmörkun sem og grímuskyldu.

- Ekki skulu vera fleiri en 50 nemendur í 1.–4. bekk í hverju rými.

- Ekki skulu vera fleiri en 25 nemendur í 5.–10. bekk í hverju rými.

- Í sameiginlegum rýmum skóla, svo sem við innganga, í anddyri, á salerni og göngum, er heimilt að víkja frá fjöldatakmörkun og reglu um blöndun hópa að því gefnu að nemendur í 8.–10. bekk og starfsfólk notist við andlitsgrímu.

- Á útisvæðum grunnskóla gilda ekki ákvæði um blöndun hópa, grímuskyldu eða nálægðartakmörkun milli nemenda.

- Halda skal sömu hópaskiptingu nemenda í grunnskólastarfi, í félagsmiðstöðvum og á frístundaheimilum þannig að ekki verði blöndun milli nemendahópa.

- Skipulagt íþrótta-, æskulýðs- og tómstundastarf barna á grunnskólaaldri er heimilt, þ.e. að hámarki 50 börn í 1.–4. bekk og að hámarki 25 í 5.–10. bekk. Ekki þarf að halda sömu hópaskiptingu og er í grunnskólastarfi.

Sjá nánar í reglugerðum heilbrigðisráðherra um takmörkun á skólastarfi nr. 1110/2020 og 1106/2020.