Þokast í átt að samkomulagi

Nokkur gangur hefur verið í viðræðum milli Landsvirkjunar og Rio Tinto varðandi endurskoðun þess raforkuverðs sem síðarnefnda fyrirtækið greiðir í tengslum við framleiðslu sína í Straumsvík.

Eru vonir bundnar við að samkomulag um verulega lækkun orkuverðsins náist fyrir áramót og herma heimildir Morgunblaðsins að raforkuverðið til verksmiðjunnar kunni að lækka um 30% í kjölfar endurskoðunarinnar. Hafa forsvarsmenn Rio Tinto verið skýrir um það að verksmiðjunni verði lokað ef raforkusamningurinn verður ekki endurskoðaður hið fyrsta.

Allt frá því í vor hefur álverksmiðjan í Straumsvík keyrt á lágmarksafköstum, þ.e. keypt það lágmark sem henni ber af raforku frá Landsvirkjun, og hefur framleiðslan því aðeins verið um 85% af því sem áætlanir gera almennt ráð fyrir.

Í samningaviðræðunum hefur komið fram að Rio Tinto muni ekki auka framleiðslu sína fyrr en samkomulag við Landsvirkjun er í höfn. Gríðarlegt tap varð af rekstri álversins í Straumsvík í fyrra og nam það 13 milljörðum króna. Kom það til viðbótar við 5 milljarða tap árið 2018, að því er fram kemur í umfjöllun um mál þetta í Morgunblaðinu í dag.