Telja eftirliti með Vöku ábótavant

„Það er ekki hægt að bjóða okkur upp á þetta lengur,“ segir Ásdís Þorsteinsdóttir, íbúi við Kleppsveg í Reykjavík. Mikillar óánægju gætir meðal íbúa í Laugarnesi með starfsemi Vöku við Héðinsgötu.

Íbúar í hverfinu, sem rætt er við í Morgunblaðinu í dag, gefa lítið fyrir þessar vendingar og óttast að allt fari í sama farið þegar leyfi hafi fengist. Tala þeir um „jólahreingerningu“ hjá Vöku og telja óhæft að fyrirtækinu hafi nokkurn tímann verið leyft að flytjast á núverandi stað. Kvartað hafi verið undan hávaða sem vakið hafi ungbörn í hverfinu, olíulykt sem lagt hafi yfir í sumar og að unglingar hafi átt greiða leið að bílhræjum á lóðinni.

„Það þekkist hvergi nema hér að svona starfsemi sé inni í þéttbýli. Þeir þykjast vera búnir að taka til en skaðinn er skeður. Hér hefur lekið niður mikið af spilliefnum og olíu. Fyrirtækið var aldrei með leyfi fyrir starfsemi utandyra og stærir sig svo af því að hreinsa þar til. Stjórnsýslan hefur ekki staðið í stykkinu og hér hefur ekkert eftirlit verið,“ segir Ásdís.