Óljóst hversu margir krakkar snúa aftur

„Auðvitað voru krakkarnir orðnir afskaplega þreyttir á þessu ástandi, hvort sem það snýr að æfingunum eða skólunum. Þjálfararnir hafa þó staðið sig frábærlega í því að koma út aukaæfingum og reynt að halda vel utan um hópana,“ segir Jóhann Þór Jónsson, formaður barna- og unglingaráðs knattspyrnudeildar Breiðabliks.

Vísar hann þar til sóttvarnareglna sem verið hafa í gildi undanfarnar vikur og mánuði. 

Krakkar fædd síðar en 2004 hafa ekki mátt stunda íþróttir undanfarnar vikur. Nú er þó breyting orðin þar á, en krakkar á umræddum aldri mega nú æfa úti í tíu manna hópum og með ströngum skilyrðum. 

Frétt af mbl.is

Sundlaugar landsins opnaðar að nýju

Vilt halda krökkum í íþróttum

„Nú má æfa í tíu manna hólfum án snertingar og með aldursskiptingu,“ segir Jóhann en tekur fram að enn eigi eftir að koma í ljós hversu margir munu hafa ákveðið að hætta sökum tímabundinnar stöðvunar æfinga. 

Frétt af mbl.is

Handboltaliðin í næstefstu deildum mega æfa

„Við óttumst þetta mjög mikið. Þessi aldur er hrikalega viðkvæmur og við vitum ekki hverjar heimturnar verða fyrr en þegar á líður. Þetta eru stórir árgangar og sannarlega sá hópur sem þú vilt að haldi áfram í íþróttum og stundi heilbrigt líferni,“ segir Jóhann Þór. 

Bendir hann jafnframt á að ástandið hafi reynst mörgum íþróttafélögum afar erfitt þegar kemur að fjárhagslegu hliðinni. Greiða þurfi þjálfurum laun jafnvel þó engar æfingar hafi verið í gangi. „Það eru allir þjálfarar á launum. Útspil ríkisins hefur hingað til ekki tekið tillit til verktaka, en langstærstur hluti þjálfara á Íslandi er á verktakagreiðslum.“

• Blogga um frétt