Birgitta er óvæntur metsöluhöfundur í ár

„Að heyra þetta orð, metsöluhöfundur, er mjög óraunverulegt. Mér finnst ég eiginlega vera stödd í einhverri sögu sjálf,“ segir rithöfundurinn Birgitta Haukdal sem komið hefur af miklum krafti inn í jólabókaflóðið í ár.

Á nýjasta metsölulista Félags íslenskra bókaútgefenda átti Birgitta fimm af 16 mest seldu bókunum í flokki barna- og ungmennabóka en þeir sem til þekkja í bókaútgáfu kannast ekki við að nokkuð sambærilegt hafi áður gerst. Þrjár af þeim komu út á þessu ári en tvær eru eldri.

„Samtals má búast við því að þetta gæti skilað henni þeim árangri að verða metsöluhöfundur Íslands árið 2020,“ segir Egill Örn Jóhannsson, útgefandi Birgittu hjá Forlaginu, í Morgunblaðinu í dag.