Fullvissaði Katrínu um bóluefni fyrir Ísland
Setja bókamerki
Katrín Jakobsdóttir forsætisráðherra og Ursula von der Leyen, forseti framkvæmdastjórnar Evrópusambandsins, ræddust við í síma í dag, en þar fóru þær yfir dreifingu bóluefna til Íslands.
Í tísti sem von der Leyen setti á Twitter kemur fram að hún hafi fullvissað Katrínu um að fyrstu sendingar bóluefnis komi til Íslands fyrir áætlaða bólusetningardaga í Evrópu, að því gefnu að lyfjaeftirlit Evrópu samþykki bóluefni Pfizer í dag.
Gert er ráð fyrir að fyrstu dagar bólusetninga í löndum Evrópusambandsins verði 27., 28. og 29. desember.
Nokkur óvissa kom upp um fjölda bóluefnaskammta sem Ísland hefði tryggt sér aðgang að um helgina þegar Bloomberg birti tölur um að Ísland stæði þar öðrum Evrópulöndum langt á eftir og að aðeins væri tryggt bóluefni fyrir um 30% þjóðarinnar, eða fyrir 103 þúsund manns. Í frétt Rúv segir að forsætisráðuneytið hafi óskað eftir símtalinu við von der Leyen vegna þessara misvísandi upplýsinga.
Sendi Stjórnarráðið frá sér leiðréttingu á því í gær og sagði að búið væri að tryggja bóluefni fyrir 200 þúsund manns með bóluefni frá AstraZeneca og Pfizer og að gert væri ráð fyrir því að skrifa upp á samning við Janssen (Johnson & Johnson) um 235.000 skammta fyrir jól, en það myndi duga fyrir um 117 þúsund manns. Einnig er stefnt að því að undirrita samning vegna bóluefna frá Moderna.
Gert er ráð fyrir því að fyrstu fimm þúsund skammtar bóluefnisins komi í vikunni, en að frá 27. desember muni 3 þúsund skammtar koma að meðaltali á viku frá Pfizer út mars.
38 létust í flugslysi
Í þögn hjartans
Spá 13-18 stiga frosti í borginni
Fuglager í Grindavík: „Þetta var bara pínu magnað“
KEF Spa: „Eitthvað sem þú hefur ekki séð áður“
Sex fluttir með þyrlunni og þar af eitt barn
Var að slitna frá bryggju sökum hvassviðris
Skoða ráðstafanir vegna mikillar kuldaspár