Tæpar tólf milljónir vegna sekta og bóta

Kostnaður Ríkisútvarpsins vegna sekta- og bótagreiðslna á árunum 2007-2019 nam 11.810.938 krónum. Þetta kemur fram í svari mennta- og menningarmálaráðherra við fyrirspurn frá Bergþóri Ólasyni, þingmanni Miðflokksins.

Segir í svarinu að um sé að ræða samtals fjórtán mál; sex stjórnvaldssektir fjölmiðlanefndar, þrjár stjórnvaldssektir Fjármálaeftirlitsins, fjögur dómsmál og eitt sektarmál hjá Sambandi evrópskra sjónvarpsstöðva, EBU.

Miðað er við verðlag ársins 2019, miðað við breytingar á vísitölu neysluverðs.

Tekið er fram að ekki sé hægt að veita upplýsingar um lögfræðikostnað vegna málanna, þar sem ekki hefur verið haldið utan um þær í bókhaldi stofnunarinnar.

Enn fremur segir að ekki liggi fyrir hversu mikill tími starfsmanna hafi farið í úrvinnslu málanna, þar sem stofnunin notist ekki við verkbókhald. Ekki sé því hægt að meta kostnað sem hlaust af þeirri vinnu.

Hæsta greiðslan tæpar 2,7 milljónir

Hæsta greiðslan nam 2.691.247 krónum og er færð til bókar árið 2016. Ekki er ljóst hvort þar sé um að ræða greiðslu bóta til Guðmundar Spartakusar fyrir um­fjöll­un­ um fíkni­efna­smygl í Bras­il­íu og Parag­væ og meinta aðild Guðmund­ar.

Stofnunin greiddi Guðmundi 2,5 millj­ón­ir í máls­kostnað og miska­bæt­ur samkvæmt samningi sem gerður var þeirra í millum. Því samkomulagi náðu Ríkisútvarpið og Guðmundur árið 2017.

Hæstirétt­ur átti síðar eftir að sýkna Sig­mund Erni Rún­ars­son, sjón­varps­mann og þáver­andi dag­skrár­stjóra Hring­braut­ar, af tveggja millj­óna króna skaðabóta­kröfu Guðmundar vegna meintra meinyrða í svipuðu máli.

Frétt af mbl.is

Greiða Guðmundi tvær og hálfa milljón

• Blogga um frétt