Hjónabakkinn innkallaður vegna ofnæmisvalda

Múlakaffi hefur að höfðu samráði við Heilbrigðiseftirlit Reykjavíkur ákveðið að kalla inn frá neytendum svonefndan Hjónabakka þar sem ofnæmis- og óþolsvaldar koma ekki fram í innihaldslýsingu. Eru þeir sem hafa ofnæmi fyrir eggjum og/eða sinnepi beðnir um að neyta ekki bakkans.

Hjónabakkinn er seldur í verslunum Krónunnar og Melabúðinni og kemur í tveimur mismunandi gerðum, annars vegar súrmeti og hins vegar nýmeti og nær innköllunin bara til bakkans með nýmetinu. Í fréttatilkynningu heilbrigðiseftirlits Reykjavíkur kemur fram að ástæða innköllunarinnar sé sú að ekki kemur fram í innihaldslýsingu að sinnep og egg séu í vörunni. 

Því er beint til neytenda vörunnar að þeir viðskiptavinir sem hafi ofnæmi fyrir eggjum og/eða sinnepi neyti vörunnar ekki og fargi henni, en einnig er hægt að skila henni í þeirri verslun þar sem hún var keypt gegn fullri endurgreiðslu. Tekið skal fram að neytendum sem ekki hafa ofnæmi fyrir sinnepi eða eggjum er óhætt að neyta vörunnar.

• Blogga um frétt