Samningur stjórnvalda við Pfizer trúnaðarmál
Ragnhildur Þrastardóttir
Setja bókamerki
Samningur stjórnvalda við lyfjaframleiðandann Pfizer um bóluefni við Covid-19 er trúnaðarmál, að sögn samskiptafulltrúa Pfizer. Eins og greint var frá í fréttum í vikunni fékk Gunnar Bragi Sveinsson þingmaður Miðflokksins ekki aðgang að bóluefnasamningum stjórnvalda við lyfjaframleiðendur þegar hann óskaði þess nýverið.
„Viðræður okkar við stjórnvöld og samningar eru trúnaðarmál. Við höfum ekkert frekar að segja um skilmála samningsins,“ segir í skriflegu svari frá samskiptafulltrúanum við fyrirspurn mbl.is.
Í fyrirspurninni var spurt hvort Pfizer hafi óskað þess að leynd hvíldi yfir samningnum eða óskað þess að þingmenn fengju hann ekki í hendurnar. Ekki fengust svör við því hvort trúnaðurinn væri tilkominn vegna beiðni stjórnvalda um slíkt eða beiðni Pfizer.
Fjórir samningar í höfn, enginn þeirra opinber
Sem fyrr segir var Gunnari Braga synjað um aðgang að samningum sem ríkið hefur gert við lyfjaframleiðendur um kaup á bóluefni við Covid-19. Í bréfi til Gunnars Braga vísar ráðuneytið til upplýsingalaga og segir erindið falla undir takmarkanir á upplýsingarétti.
Í bréfinu segir að hvorki aðildarríki ESB né Noregur hafi afhent sambærilega samninga og að það sé mat ráðuneytisins að slík afhending geti spillt samskiptum við lyfjaframleiðendur.
Í samtali við mbl.is á þriðjudag sagði Gunnar Bragi mikilvægt að Íslendingar væru upplýstir um það hvernig stjórnvöld hafa samið fyrir þeirra hönd.
Íslensk stjórnvöld hafa gert samninga við fjögur lyfjafyrirtæki um bóluefni, Pfizer/BioNTech, Moderna, AstraZeneca og Janssen - Johnson & Johnson. Að auki hafa þrjú önnur lyfjafyrirtæki gert samninga við Evrópusambandið um bóluefni.
Gasmengun gæti borist yfir höfuðborgarsvæðið
Hulda saksóknari: „Tökum þetta ekki til greina“
Vika í kosningar: Þetta segja kannanir
Í kappi við tímann að reyna að afstýra verkfalli
Pútín reynir allt til að forðast aðra herkvaðningu
Reiðubúin að aflýsa verkföllum í fjórum leikskólum
Vegirnir voru eins og borðstofuborð