„Óásættanleg staða“

„Þetta er auðvitað óásættanleg staða í nútímasamfélagi,“ segir Elías Pétursson, bæjarstjóri Fjallabyggðar, í samtali við mbl.is. Íbúar Fjallabyggðar, í Siglufirði og á Ólafsfirði, hafa verið innilokaðir nánast alla vikunni vegna vegalokana og snjóflóðahættu.

Hægt var að opna Siglufjarðarveg og Ólafsfjarðarveg í nokkrar klukkustundir í gær áður en aftur þurfti að loka þeim vegna veðurs.

Frétt af mbl.is

Versnandi veður með skafrenningi og blindu

Útlit er fyrir áframhaldandi innilokun um helgina en gul veðurviðvörun er í gildi á Tröllaskaga og þar snjóar áfram en tvö snjóflóð, á Ólafsfjarðarvegi á mánudag og skíðasvæðinu á Siglufirði á miðvikudag, hafa fallið. Auk þess þurfti að rýma níu hús á Siglufirði vegna snjóflóðahættu.

Göngin „barn síns tíma“

Sé farið vestur frá Siglufirði er ekið um Strákagöng, opnuð 1967, en í áttina að Akureyri frá Ólafsfirði er ekið um Múlagöng en þau opnuðu 1991.

Ein gömul og góð frá Strákagöngum Siglufjarðarmegin.

Elías segir bæði göngin barn síns tíma og gera þurfi betur til að tryggja ásættanlegar samgöngur.

Frá Múlagöngum. mbl.is/Sigurður Ægisson

„Þegar komið er út úr Múlagöngum í átt til Akureyrar er komið á snjóflóðahættusvæði og mikið snjóþyngslasvæði,“ segir Elías. Staðan sé litlu skárri vestanmegin við Strákagöng:

„Þar hefur vegurinn sigið mjög mikið og óttast menn hreinlega að hann fari í sjóinn,“ segir Elías. Þar er mik­il hætta á jarðsigi, skriðuföll­um, grjót­hruni og snjófljóðum, auk þess sem veg­ur­inn er oft ófær.

Frétt af mbl.is

„Hrikalegar“ aðstæður á Siglufjarðarvegi

Bæjarstjórinn segir lausnina við þessu betri jarðgöng í báðar áttir en þau sé ekki á teikniborðinu og það sé miður. Að hans mati sé algjört lágmark að tryggja góðar og öruggar samgöngur nú þegar nánast allir flutningar fari landleiðir en samgöngur hafi ekki verið öruggar í Fjallabyggð.

• 1 blogg um fréttina

Bloggað um fréttina

• Jóhannes Ragnarsson: Vælandi og innilokaður bæjarstjóri grenjar á hjálp