Landsréttur þyngir dóm fyrir peningaþvætti

Landsréttur hefur þyngt dóm yfir Hafþóri Loga Hlynssyni, sem fundinn var sekur um peningaþvætti í Héraðsdómi Reykjavíkur í nóvember 2018. Sá refsidómur var sá tólfti sem Hafþór hafði hlotið síðan í desember árið 2003, en hann er fæddur árið 1987.

Dómur í málinu var kveðinn upp í réttinum í dag, en ríkissaksóknari hafði áfrýjað málinu og ákæruvaldið krafist þess að refsing Hafþórs yrði þyngd.

Hafþór var handtekinn í maí árið 2017 og í fram­hald­inu gerð leit á heim­ili hans. Fann lög­regl­an þá 1,8 millj­ón­ir und­ir rúm­dýnu, en Hafþór sagðist hafa tekið þá upp­hæð úr banka því hann skuldaði bank­an­um. Þá fund­ust einnig tals­verðir fjár­mun­ir í leyni­hólfi bak við eld­hús­inn­rétt­ingu á heim­ili hans sem og á honum sjálfum.

Rúmar átta milljónir króna

Dómurinn laut einnig að innflutningi Teslu-bifreiðar frá Litháen. Hafði Hafþór fengið greiðslu frá trygg­inga­fé­lagi fyr­ir Audi-bif­reið sem hafði skemmst auk þess sem hann sagðist hafa fengið lán. Lét hann fé­laga sinn, sem einnig var ákærður og dæmd­ur í mál­inu í héraðsdómi, fá upp­hæðina og skipti hann fénu í evr­ur og var greitt fyr­ir bif­reiðina með reiðufé í Lit­há­en.

Í dómi réttarins segir að Hafþór sé sakfelldur fyrir að hafa um nokkurt skeið aflað sér ávinnings með refsiverðum brotum. Hann hafi ekki gefið trúverðugar skýringar á misræmi í útstreymi fjár af reikningum og skráðum tekjum á sama tímabii.

Talið var hafið yfir skynsamlegan vafa að hann hefði á umræddum tíma aflað sér ávinnings að fjárhæð allt að 8.121.760 krónum með refsiverðum brotum.

Tuttugu mánuðir í stað tólf

Var niðurstaða héraðsdóms um sakfellingu og upptöku fyrrnefndra fjármuna og bifreiðarinnar staðfest.

Fangelsisdómur Hafþórs var aftur á móti þyngdur, eins og áður sagði. Héraðsdómur hafði kveðið á um tólf mánaða fangelsi en Landsréttur ákveður að hann skuli sæta fangelsi í tuttugu mánuði.

Frétt af mbl.is

Hafþór fær 12 mánaða dóm fyrir peningaþvætti

Við ákvörðun refsingar var litið til þess að brot hans voru hegningarauki við þrjá eldri dóma. Var einn þeirra skilorðsdómur sem var tekinn upp og dæmdur með málinu.

Hafþór Logi var einnig dæmdur til tuttugu mánaða fangelsisvistar í janúar árið 2019, þá fyrir aðild sína að gagnaversmálinu, en hann tilheyrði hinu svokallaða föruneyti, sem var nafn sem glæpamennirnir völdu með vísun í Hringadróttinssögu.

Frétt af mbl.is

„Kannski veit ég hvar tölvurnar eru“

• Blogga um frétt