„Svakalegt frost“ á Akureyri

Það er „svakalegt frost“ á Akureyri en veðrið er engu að síður fallegt. Þetta segir varðstjóri hjá lögreglunni á Norðurlandi eystra spurður út í veður og færð í bænum.

Klukkan þrjú í nótt var 22 stiga frost á flugvellinum á Akureyri en á sama tíma mældist 15 stiga frost við lögreglustöðina inni í bænum.

Að sögn varðstjórans hefur færðin verið góð undanfarna daga, bæði á Akureyri og í nágrenni, enda ekkert snjóað. Mikil snjókoma var um síðustu helgi og sátu margir bílar fastir í kjölfarið. Eftir að búið var að moka hefur færðin verið góð og allar leiðir meira og minna greiðfærar.