Þarf að vera duglegur til þess að svona verslun dafni

„Það er alveg hægt að reka svona verslun ef þú ert nógu duglegur. Þetta er erfiður bissness og það þarf að gera mikið sjálfur,“ segir Axel Sigurðsson, nýr eigandi Pétursbúðar í Vesturbæ Reykjavíkur.

Axel er 29 ára og keypti verslunina ásamt fjölskyldu sinni fyrir skemmstu. Hann hefur unnið í Pétursbúð síðustu tvö ár og þekkir því vel til rekstursins. Axel á að baki tólf ára feril í verslunarstörfum og starfaði til að mynda lengi í Bónus.

Fyrri eigendur höfðu rekið Pétursbúð frá árinu 2006 en auglýstu verslunina til sölu vegna óviðráðanlegra aðstæðna. Verslun hefur verið rekin á neðri hæð hússins á Ránargötu 15 frá því það var byggt árið 1928. Upphaflega var rýminu skipt í kjörbúð og mjólkurbúð, síðan var einnig fiskbúð í áföstu rými og svo lítil verslun en með tímanum varð úr ein heil kjörbúð. Nafnið Pétursbúð mun hafa fylgt búðinni síðustu þrjá áratugina og nýtur hún mikilla vinsælda meðal fólks í miðbænum og Vesturbænum, að því er fram kemur í  Morgunblaðinu í dag.