Innlent | mbl | 1.2.2021 | 7:39

Nýting Laugalands minnkað en kostnaður hækkað

Laugaland er meðferðarheimili sem staðsett er í Eyjafjarðarsveit. Þar er pláss fyrir 6-7 stúlkur á aldrinum 13-18 ára. mbl.is/Ófeigur

Nýting meðferðarheimilisins Laugalands hefur farið niður á við á síðustu árum en kostnaður við rekstur þess hefur hækkað á sama tímabili. Nýtingarhlutfall heimilisins var undir 30% í fyrra.

Þetta er á meðal þess sem kemur fram í skriflegu svari Barnaverndarstofu við fyrirspurn Fréttablaðsins um nýtingu og kostnað við meðferðarheimilið.

Þar segir að ekkert barn hafi dvalið á Laugalandi í 98 daga í fyrra eða frá 13. ágúst til 19. nóvember í fyrra. Að jafnaði dvöldu 1,7 börn á heimilinu. Heildarkostnaður vegna Laugalands í fyrra var 166,9 milljónir.

Frétt af mbl.is

Lokun Laugalands ekki ákvörðun Barnaverndar

Árið 2012 var nýtingarhlutfall á Laugalandi 98,4%. Hlutfallið féll niður í 77,1% árið 2018, 50% árið 2019 og 29,6% árið 2020.

Eins og fram hefur komið í fjölmiðlum hefur hópur fyrrverandi skjólstæðinga, aðstandenda og fagaðila á Laugalandi í Eyjafirði sett á fót síðu sem heldur utan um áskorun þeirra til félags- og barnamálaráðherra og forstjóra Barnaverndarstofu um að loka ekki úrræðinu.