Leit að John Snorra Sigurjónssyni, Muhammad Ali Sadpara og Juan Pablo Mohr hefur verið hætt í dag enda farið að rökkva í Pakistan. Leit verður fram haldið á morgun.
Ekkert hefur spurst til fjallgöngumannanna síðan klukkan fimm á föstudagsmorgun að íslenskum tíma. Þetta kemur fram í pakistönskum miðlum.
Tvær pakistanskar herþyrlur hafa leitað fjallgöngumannanna í eins mikilli hæð og þyrlurnar þola, 7.800 metra hæð. Þegar seinast heyrðist frá John Snorra og félögum voru þeir í um 8.200 metra hæð.
Sonur Ali Sadpara, Sajid Sadpara, var með köppunum lengst af en þurfti að snúa til baka eftir að súrefniskútur hans bilaði. Hann er nú kominn í grunnbúðir og er svartsýnn á að faðir hans og félagar finnist á lífi.
Hann segir að erfitt væri að standa af sér svo langa dvöl á eins hættulegum stað. Hann segist þó viss um að John Snorri og félagar hafi náð á topp K2 en að eitthvað hafi komið fyrir á leiðinni niður.