Innlent | mbl | 8.2.2021 | 14:14

Ánægjuleg opnun eftir fjögurra mánaða þurrk

Þórdís Karen Þórðardóttir dælir bjór á Dönsku kránni. mbl.is/Eggert Jóhannesson

Skemmtistaðir og krár opna í dag fyrir viðskiptavinum eftir rúmlega fjögurra mánaða lokun í þriðju bylgju Covid-19-faraldursins. Stöðunum var lokað 4. október en opna í dag þegar tilslakanir á sóttvarnaaðgerðum taka gildi.

Heimilt er að opna að nýju skemmtistaði, krár, spilasali og spilakassa að uppfylltum skilyrðum. Veitingastaðir með áfengisveitingar skulu ekki hafa opið lengur en til kl. 22 á kvöldin. Sama gildir um spilakassa og spilasali. Veitingar skulu afgreiddar gestum í sæti.

Frétt af mbl.is

Skemmtistaðir og krár opnuð að nýju

„Við erum gríðarlega ánægð með að fá að opna og geta komið starfsfólki aftur í vinnu,“ segir Arnar Þór Gíslason, einn eigenda Lebowski bars, Kalda bars, Enska barsins, The Irishman Pub og Dönsku kráarinnar, við mbl.is.

Björn Árnason og Kristinn Karlsson undirbúa opnun á Skúla Craft bar. mbl.is/Eggert Jóhannesson

Hann segir einnig mikilvægt að bjóða fólki upp á annað en að vera á veitingastöðum, en kaffihús, veitingastaðir og hótelbarir gátu haft opið meirihluta tímans frá 4. október; ólíkt krám.

„Gleði kúnna okkar er því mikil,“ segir Arnar en dyrnar að stöðunum sem hann rekur opnuðu í hádeginu. Nú þegar hafa einhverjir rekið inn nefið í einn kaldan, að sögn Arnars.

Fyrsti gestur dagsins á Enska barnum. mbl.is/Eggert Jóhannesson

„Við höfum auðvitað opið eftir gríðarlegum takmörkunum sem við verðum að passa vel upp á og vonandi verður í framhaldinu hægt að aflétta aðeins meira,“ segir Arnar en 20 manns geta verið í hverju hólfi og þarf að viðhalda tveggja metra reglu og grímuskylda er þegar ekki er setið til borðs.

Arnar og starfsfólk staðanna undirbjuggu hólfaskiptingu alla helgina og nú hlakkar hann til að taka á móti kúnnum.

„Ég hvet alla bar- og kráareigendur til að fylgja reglum og veitingastaðaeigendur til að fylgja reglum líka svo við, kráareigendur, þurfum ekki að loka aftur,“ segir Arnar.