Göngudeildin líklega einsdæmi á heimsvísu

Páll Matthíasson, forstjóri Landspítalans.
Páll Matthíasson, forstjóri Landspítalans.

Tæplega 300 einstaklingar hafa þurft innlögn á Landspítala og 17% þeirra stuðning á gjörgæslu vegna kórónuveirunnar. Þetta hefur haft gríðarleg áhrif á rekstur spítalans, sem öllu jafna keyrir á yfir 100% nýtingu rýma, þótt viðmið sambærilegra sjúkrahúsa sé um 85% að sögn Páls Matthíassonar forstjóra spítalans. 

Páll segir í pistli sínum á vef Landspítalans að þrátt fyrir þau vonbrigði að ekki verði af rannsókn í samstarfi við Pfizer, sé ekki úr vegi að fagna þeim árangri sem náðst hefur í baráttunni við Covid-19. Engir sjúklingar eru með virkt smit á spítalanum og í eftirliti göngudeildarinnar eru færri en 30 einstaklingar. 

Þá hafa rúmlega 40% starfsmenn spítalans lokið bólusetningu. 

„Þetta er auðvitað ekkert minna en stórkostlegt, nú þegar ekki einu sinni ár er liðið frá því að fyrsta smit greindist hér á landi. Það er frábær og eftirtektarverður árangur sem við ættum öll að fagna. Á sama tíma verðum við að muna, sérstaklega þegar slakað verður á sóttvarnaráðstöfunum í samfélaginu á næstunni, að persónubundnar sóttvarnir eru lykillinn. Ef þær bregðast þá getur faraldurinn farið á flug, sem við viljum alls ekki að gerist, hvað sem bólusetningum okkar viðkvæmustu hópa líður,“ skrifar Páll. 

Símtölin líflína í einangruninni

Páll segir að árið 2020 hafi eins og við var að búast einkennst af kórónuveirufaraldrinum. Í fyrsta sinn í sögu spítalans var spítalinn á neyðarstigi frá 25. október-12. nóvember, en meiri part ársins var síðan óvissustig í gildi.

Páll segir að Covid-19 göngudeild spítalans hafi skipt sköpum í baráttunni við faraldurinn og sé líklega eindæmi á heimsvísu. 

„Símtöl Covid-göngudeildarinnar, sem á síðasta ári voru um 35 þúsund, hafa án efa forðað mörgum frá innlögn og alveg ljóst af viðbrögðum þeirra sem þjónustuna hafa þegið að fyrir mörgum var símtalið líflínan í fásinni einangrunarinnar,“ skrifar Páll. 

mbl.is
Fleira áhugavert
Fleira áhugavert