Innlent | mbl | 14.2.2021 | 7:32 | Uppfært 9:00

Áfram rignir talsvert austast á landinu

Kort/Veðurstofa Íslands

Víða er allhvöss eða hvöss suðaustan- og austanátt á landinu en sums staðar stormur til fjalla. Talsverð eða mikil rigning er á Suðausturlandi og Austfjörðum en rigning af og til í öðrum landshlutum.

Síðdegis í dag dregur úr vindi og vætu, þó ber að taka fram að áfram mun rigna talsvert austast á landinu fram á nótt að sögn veðurfræðings á Veðurstofu Íslands. Óvissustig er í gildi vegna ofanflóðahættu á Austurlandi.

Frétt mbl.is

Frétt af mbl.is

Lýsa yfir óvissustigi á Austurlandi

Svipaður hiti verður í dag og á morgun, eða á bilinu 3 til 8 stig að því er segir í hugleiðingum veðurfræðings á Veðurstofu Íslands.

Gul viðvörun hefur verið í gildi frá miðnætti á Austfjörðum og eru gular viðvarnir í gildi þar til klukkan 5 í fyrramálið, mánudag. „Suðaustan- og austanhvassviðri, 13-18 m/s og talsverð eða mikil rigning. Aukið afrennsli í ám og lækjum.“

Á Suðausturlandi hefur gul viðvörun verið í gildi síðan í gærmorgun og gildir hún til klukkan 1 aðfaranótt mánudags. „Vaxandi suðaustanátt, 13-20 m/s og snarpar vindhviður við fjöll. Talsverð eða mikil rigning. Líkur á auknu vatnsrennsli í ám og lækjum.“

Óvissustig vegna ofanflóðahættu tók gildi á Austurlandi klukkan 20 í gærkvöld vegna mikillar rigningarspár þangað til á morgun. Þar hlýnar í dag og gæti rignt upp í fjallatoppa í SA 13-18 m/s. Spáð er uppsafnaðri úrkomu á bilinu 100-200 mm.

„Talsverður snjór er sums staðar í fjöllum og við þessar aðstæður gætu vot snjóflóð fallið og jafnvel krapaflóð eða skriður þegar líður á veðrið.“

Veðurhorfur í dag og næstu daga.

Suðaustan- og austanátt, víða á bilinu 13-20 m/s. Talsverð eða mikil rigning á Suðausturlandi og Austfjörðum en rigning af og til í öðrum landshlutum. Dregur úr vindi og úrkomu síðdegis. Sunnan 8-15 í kvöld og skúrir en áfram talsverð rigning austast á landinu. Hiti 2 til 8 stig.

Sunnan 8-13 á morgun og skúrir eða rigning, en bjartviðri norðan- og norðaustanlands. Hiti breytist lítið.

Á mánudag:
Sunnan 8-13 m/s og skúrir eða rigning en bjartviðri norðan- og norðaustanlands. Hiti 2 til 7 stig.

Á þriðjudag:
Austlæg átt 5-13 m/s og rigning með köflum en þurrt að kalla á norðanverðu landinu fram á kvöld. Hiti breytist lítið.

Á miðvikudag:
Breytileg átt og víða rigning eða slydda en styttir upp á Norður- og Austurlandi síðdegis. Hiti 1 til 6 stig.

Á fimmtudag:
Breytileg átt og líkur á slyddu eða snjókomu norðan- og austanlands en rigningu við ströndina. Úrkomulítið sunnan heiða. Hiti um og yfir frostmarki.

Á föstudag:
Norðaustanátt og víða þurrt veður en dálítil él með norður- og austurströndinni. Frost 0 til 5 stig.

Á laugardag:
Norðlæg átt, þurrt að kalla og vægt frost en skúrir eða él norðaustan- og austanlands með hita kringum frostmark.