Innlent | mbl | 15.2.2021 | 11:40

„Fresta“ öskudeginum vegna Covid-19

Frá öskudeginum í fyrra. Hann verður líklega með öðru sniði í ár. Eggert Jóhannesson

Hvorki verður sælgæti né skipulögð dagskrá í helstu verslunarmiðstöðvum landsins á öskudag. Smáralind, Kringlan og Glerártorg hafa allar tekið ákvarðanir um að sleppa slíku þetta árið og ætlar Smáralindin að „fresta“ öskudeginum í ár.

Þessa ákvörðun tóku verslunarmiðstöðvarnar vegna kórónuveirufaraldursins.

Börn flykkjast almennt í verslanir á öskudag á höttunum eftir sælgæti. Því verður öskudagurinn líklega með öðru sniði í ár eins og svo margt annað í þessum faraldri.

Almannavarnir hafa gefið út tilmæli um öskudag á tímum Covid. Þar eru settar fram hugmyndir um öðruvísi öskudag sem hentar á þessum tímum. Hér má finna tilmæin.

„Ákvörðun þessi er tekin að vel ígrunduðu máli og til að koma í veg fyrir hópamyndanir og tryggja sóttvarnir til fulls, en vanalega koma fleiri þúsundir barna í Smáralind þennan dag og þeim fylgir mikill fjöldi fullorðinna líka. Við teljum það því samfélagslega ábyrgt af okkur að „fresta“ öskudeginum þetta árið og höldum hann enn hátíðlegri á næsta ári þegar aðstæður verða okkur hliðhollari,“ segir í tilkynningu frá Smáralind vegna málsins.

Engir sælgætisleiðangrar út fyrir hverfin

Í tilkynningu Kringlunnar kemur fram að almannavarnir mælist til þess að foreldrar og forráðamenn haldi börnum í sínu hverfi og sendi þau ekki í sælgætisleiðangra út fyrir hverfin.

„Kringlan mun að sjálfsögðu styðja tilmæli almannavarna og því verður ekki boðið upp á skipulagða skemmtidagskrá né nammi í verslunum, líkt og vonir höfðu staðið til. Við verðum því með aðrar leiðir til að gleðja bestu vini okkar, börnin, á þessum stóra hátíðardegi þeirra,“ segir í tilkynningu Kringlunnar.

Á Glerártorgi á Akureyri er alla jafna mikið um að vera á öskudaginn. Nú er breyting á því, það verður engin söngvakeppni, engin búningakeppni, ekki verður sleginn kötturinn úr tunnunni og ekki verður í boði að syngja í verslunum.

„Okkur þykir þetta virkilega leiðinlegt enda einn af okkar uppáhaldsdögum á Glerártorgi.

Nú þegar við erum vonandi á lokametrunum í baráttunni við Covid-19 teljum við það mikilvægt að halda þetta út og sýna samfélagslega ábyrgð með því að sporna við hópsöfnun og viðhalda að sama skapi því trausti sem fólk hefur borið til okkar í gegnum undanfarið ár þegar kemur að sóttvörnum,“ segir í tilkynningu Glerártorgs um málið.