Keilir sniðgengur Sýn vegna niðrandi ummæla

Markaðssvið Keilis – miðstöðvar vísinda, fræða og atvinnulífs, hefur ákveðið að veita auglýsingafé sínu í aðra átt en að miðlum Sýnar næstu misserin.

Þetta er gert „í ljósi nýbirtra upplýsinga er varða líkamssmánun og skeytingarleysi starfsmanna gagnvart umræðunni“, að því er kemur fram í yfirlýsingu.

Frétt af mbl.is

Zúúber tekinn af dagskrá eftir niðrandi ummæli

„Garðurinn vex þar sem þú vökvar hann. Lítilsvirðing og smánun vegna holdafars er samfélagsmein og sorglegt að sjá hana koma frá fagaðilum í heilsurækt. Forvarnir, íhlutanir, rannsóknir og breyttur hugsunarháttur eru umtalsvert skilvirkari leiðir til þess að skila jákvæðum niðurstöðum í vegferð að almennt bættu heilsufari en að smætta þá sem falla ekki í ákveðið útlitslegt form,“ segir í yfirlýsingunni.

Þar kemur fram að menntun sé sjálfstyrking og gífurlega mikilvægur þáttur í starfi Keilis. Hana vilji þau efla í hvívetna.

„Siðareglur Keilis kveða á um að við komum í veg fyrir að í starfi okkar viðgangist hvers kyns óréttlæti. Því kjósum við að leita á önnur, jákvæðari, mið með fjármuni okkar og lýsum yfir einlægri von um að málsaðilar komi fram við alla líkama af aukinni virðingu í framtíðinni.“

• Blogga um frétt