Kom manni í hjartastoppi til bjargar í sundi

Halldór Skúlason, sundlaugarvörður í Álftaneslaug til tólf ára, kom á þriðjudag manni til bjargar sem hafði farið í hjartastopp í sundlauginni. 

Halldór segir í samtali við mbl.is að atvikið hafi átt sér stað snemma á þriðjudagsmorgun. 

„Við opnum á morgnanna klukkan hálf sjö og þessi maður er eiginlega fyrsti viðskiptavinurinn, hann og félagar hans fara ofan í akkúrat klukkan hálf sjö og ég held að hjartað í honum hafi bara stoppað,“ segir Halldór. 

Maðurinn fór aldrei í kaf þökk sé skjótum viðbrögðum laugargesta. 

„Það er maður við hliðina á honum í lauginni, og þegar hann leggst yfir línuna sem er á milli brauta kippir sá maður í hann svo hann detti ekki ofan í og kallar í mig. Við komum honum upp á laugarbakkann og ég hringi í neyðarlínuna og byrja svo bara að hnoða,“ segir Halldór. 

Halldór og sundlaugargestir beittu endurlífgun í sjö til átta mínútur þar til sjúkrabíll kom á staðinn. 

Halldór Skúlason. Ljósmynd/Aðsend

„Hann var alveg dáinn, sjúkrabíllinn kom svo eftir einhverjar sjö eða átta mínútur og þeir þurftu að gefa honum tvö stuð til að koma hjartanu í gang. Hann leikur núna á alls oddi upp á hjartadeild. Þetta endaði eins vel og hugsast gat. Eina er að hann kvartar undan verki í brjóstkassanum og er smá marinn þar eftir mig,“ segir Halldór og bætir við: 

„Ég var náttúrulega alls ekki einn, það voru þarna sundlaugargestir sem hjálpuðu og þeir blésu meðan ég hnoðaði og náðu í eitthvað hlýtt á manninn svo hann myndi ekki kólna þarna úti.“

Á von á manninum í laugina áður en langt um líður

Halldór segir engar sambærilegar uppákomur hafa komið upp í Álftaneslaug áður.

Spurður hvort að það hafi ekki verið mikið áfall að þurfa að takast á við svona aðstæður segir Halldór: 

„Ekki á meðan á þessu stendur en þú ferð svo í smá sjokk tíu mínútum seinna þegar maðurinn er farinn og þú veist kannski ekkert hvernig framhaldið verður. Þú átt ekki endilega von á því að fá einhverjar fréttir, en mágur hans kemur alltaf með honum í sund á morgnanna og leyfði mér að fylgjast með. Ég heyrði í gær að hann væri með fullri heilsu svo það létti mikið á manni. Ég á von á honum hérna í laugina á mánudagsmorgun þess vegna.“

• Blogga um frétt