Þriggja ára dómur fyrir nauðgun og fleiri brot

Landsréttur hefur snúið við dómi Héraðsdóms Reykjaness og dæmt karlmann í þriggja ára fangelsi fyrir nauðgun og kynferðisbrot gegn dóttur þáverandi sambýliskonu sinnar.

Hann var einnig sakfelldur fyrir kynferðisbrot með því að hafa skoðað í farsíma sínum 85 ljósmyndir og eina hreyfimynd sem sýndu börn á kynferðislegan hátt og fyrir að hafa haft í vörslum sínum 1,44 grömm af kókaíni.

Maðurinn var dæmdur til að greiða 2/3 hluta sakarkostnaðar málsins í héraði og fyrir Landsrétti, sem samtals nemur rúmum fjórum milljónum króna.

Héraðsdómur hafði sýknað manninn af nauðgun og kynferðisbroti gegn barni en dæmt hann til að greiða 300 þúsund krónur í sekt fyrir að skoða ljósmyndirnar og hreyfimyndina og fyrir fíkniefnalagabrot.

„Við ákvörðun refsingar X var litið til þess að með háttsemi sinni nýtti hann sér yfirburðastöðu sína gagnvart A og traust hennar og trúnað sem sambýlismaður móður hennar,“ segir í útdrætti Landsréttar.

Ríkissaksóknari skaut málinu til Landsréttar árið 2018 en brotin áttu sér stað á árunum 2016 og 2017.

• Blogga um frétt