Rétttrúnaðarkirkjan fær framlengdan frest

Borgarráð samþykkti á fundi sínum á fimmtudag að veita rússnesku rétttrúnaðarkirkjunni á Íslandi tveggja ára viðbótarfrest til að hefja framkvæmdir við byggingu kirkju á lóð sinni í gamla Vesturbæ Reykjavíkur.

Saga lóðarúthlutunarinnar er orðin ansi löng en kirkjan fékk lóðina fyrst úthlutaða í október 2008 fyrir byggingu kirkju. Lóðin liggur á gatnamótum Mýrargötu og Bakkastígs skammt frá Loftkastalanum, en samningur var undirritaður um leiguna í apríl 2011 með þeim skilyrðum að framkvæmdir yrðu hafnar innan þriggja ára.

Kirkjan frá Mýrargötu. Teikning/Arkitekto

Vegna óánægju nágranna með upphaflegar tillögur að kirkjubyggingu, og breytinga á deiliskipulagi sem fylgdu, tafðist undirbúningur en breyta þurfti hönnun kirkjunnar. Var rétttrúnaðarkirkjunni þá gefinn frestur til 31. janúar 2021 til að hefja framkvæmdir.

Óskaði rétttrúnaðarkirkjan síðar eftir framlengdum fresti vegna þess skamma fyrirvara sem var til stefnu eftir samþykkt borgarráðs, sem og áhrifa heimsfaraldurs kórónuveirunnar á framþróun verkefnisins og aðkomu fjárfesta. Var hann sem fyrr segir veittur og hefur rétttrúnaðarkirkjan því fram til 31. janúar 2023 til að hefja framkvæmdir. 

• Blogga um frétt