„Þetta verður ekkert rosalega auðvelt“

Bjartur Norðfjörð vaknaði rétt fyrir klukkan fjögur í nótt til að hlaupa fyrstu 6,5 kílómetrana í tólf lotna hlaupaáskorun sem spannar samtals tvo sólarhringa. Þar er markmiðið að hlaupa fjórar mílur á hverjum fjórum klukkustundum í 48 tíma.

„Ég sé það alveg núna að þetta verður ekkert rosalega auðvelt,“ segir Bjartur í samtali við mbl.is.

Hann lætur það þó ekki á sig fá enda er hlaupið í nafni góðs málstaðar. Bjartur er að safna fyrir kunningja sinn Brand Bjarnason Karlsson, sem sjálfur er á leið í ferð um landið til að vekja athygli á réttindum fatlaðra.

Frétt af mbl.is

Mjög þung áskorun fram undan

Þegar hafa safnast meira en 200.000 krónur inn á reikning: „Það gengur ekkert smá vel og þetta er strax komið langt fram úr væntingum,“ segir Bjartur. Hann segir að Bjarni sé mjög ánægður með aðstoðina.

Brandur Bjarnason Karlsson er þekktur fötlunaraðgerðasinni. Hann hefur verið lamaður fyrir neðan háls í um áratug en ferðast vítt og breitt um landið til að stuðla að umræðu um m.a. aðgengismál. mbl.is/Golli

Bjartur segir að hann sjái fram á að næturnar verði erfiðastar og það hafi verið skrýtin tilfinning að vera að skokka um miðja nótt, þegar enginn var á ferli. Á meðan enn er bjart er þetta þó hægðarleikur, Bjartur fær tíma til að borða og hvíla sig aðeins á milli hlaupa. Hann á rúmlega einn og hálfan sólarhring eftir.

Bjartur þarf að hlaupa 6,5 kílómetra á fjögurra klukkustunda fresti. Ljósmynd/Instagram

• Blogga um frétt