Hafi sent ráðuneytinu 12 minnisblöð

Menntamálastofnun hefur sent menntamálaráðuneytinu 12 minnisblöð vegna framkvæmdar samræmdra prófa frá 2018. Þetta segir Arnór Guðmundsson, forstjóri Menntamálastofnunar, í samtali við mbl.is.

Hundruð nemenda í 9. bekk grunnskóla náðu ekki að ljúka samræmdu prófi í íslensku í gær vegna tæknilegra örðugleika og hefur prófum í stærðfræði og ensku verið frestað.

Frétt af mbl.is

„Algjörlega óviðunandi“

„Við vildum ekki fara aftur af stað með próftöku fyrr en við værum fullviss um að þjónustuaðili prófkerfisins væri búinn að koma í veg fyrir þessi tæknilegu vandamál sem komu upp í gær. Nógu mikið er álagið á nemendur,“ segir Sverrir Óskarsson, sviðsstjóri matssviðs Menntamálastofnunar. Þá segir hann að fjármagn til Menntamálastofnunar hafi verið skorið niður fyrir árin 2020 og 2021 á sama tíma og mikil þörf sé að byggja upp stafræna innviði.

Prófin verði stöðvuð meðan lausn sé fundin

Arnór segir stofnunina ítrekað hafa kallað eftir auknu fjármagni til kaupa á nýju prófkerfi og segir 12 minnisblöð varðandi framkvæmd samræmdra prófa hafa verið send ráðuneytinu frá 2018 þegar tæknilegir örðugleikar komu upp við próftöku.

Frétt af mbl.is

Prófum frestað og prófið endurtekið

„Við höfum bent á að þetta kerfi sé ekki fullnægjandi og jafnvel lagt til að prófin verði stöðvuð tímabundið á meðan sé verið að finna ásættanlega lausn. Við höfum hingað til ekki fengið nein viðbrögð við því og erum því að keyra prófin áfram á þessu úrelta kerfi.“

Arnór vonast til þess að í kjölfar atviksins í gær verði málið tekið alvarlega. Stofnunin hafi sýnt mikla ábyrgð í málinu og hafi hagsmuni nemenda alltaf í forgrunni. „Við teljum að við höfum gert allt sem við getum okkar megin.“

Arnór Guðmundsson, forstjóri Menntamálastofnunar. mbl.is/Árni Sæberg

• Blogga um frétt