Hörður Felix kemur í stað Jóns Steinars
Setja bókamerki
„Hörður Felix Harðarson, hæstaréttarlögmaður, hefur tekið að sér að vinna að tillögum um mögulega styttingu á málsmeðferðartíma sakamála á rannsóknar- og dómstigi. Jón Steinar Gunnlaugsson, fv. hæstaréttardómari, óskaði í morgun eftir því að vera leystur frá verkefninu og hef ég fallist á þá beiðni.“
Þetta kemur fram í færslu Áslaugar Örnu Sigurbjörnsdóttur dómsmálaráðherra á Facebook. Greint var frá skipun Jóns Steinars fyrr í vikunni og sætti valið á honum nokkurri gagnrýni. Jón Steinar sakaði gagnrýnendur um að nota nafn hans til að koma höggi á dómsmálaráðherra.
Hagur allra að málin taki ekki of langan tíma
Í færslunni áréttar Áslaug Arna að tildrögin að þessu verkefni sem Hörður Felix mun leiða hafi verið síendurteknar fréttir af löngum málsmeðferðartíma efnahagsbrota, einkum í svonefndum hrunmálum.
„Ég hef átt samtöl við fjölda lögmanna sem sinnt hafa slíkum málum og öll erum við sammála um að úrbóta í málaflokknum sé þörf. Niðurstaða þeirrar vinnu sem nú er ráðist í getur gagnast einnig í fleiri brotaflokkum. Það er hagur allra að rannsókn og meðferð mála fyrir dómstólum taki ekki of langan tíma,“ skrifar dómsmálaráðherra.
Mikilvægt að hlusta á ólík sjónarmið
Hörður Felix mun kalla sérfróða aðila að borðinu, fólk með reynslu og þekkingu sem verjendur í sakamálum til að leggja sín lóð á vogarskálarnar.
„Ég tel mikilvægt að hlusta á ólík sjónarmið í þessu efni, meðal annars frá þeim sem starfa ekki innan kerfisins. Afraksturinn verður tekinn til skoðunar og í framhaldinu kallað eftir sjónarmiðum fleiri aðila, t.d. réttarfarsnefndar,“ skrifar ráðherra einnig.
Leiðum er lokað í Heiðmörk vegna vatnsverndar
„Skömm að því“
„Ég hef ekki lesið mína eigin bók“
Skoða verkfallsbrot í Snæfellsbæ
„Leiðinleg og erfið staða“
Fimm Íslendingar á brottvísunarlista