Tveir möguleikar í stöðunni
Jóhann Ólafsson
Setja bókamerki
„Staðan er óbreytt,“ segir Magnús Tumi Guðmundsson, prófessor í jarðeðlisfræði, um jarðskjálftahrinu og kvikuganginn á Reykjanesskaga. Jarðskjálfti sem mældist 5 að stærð varð við Fagradalsfjall klukkan 07:43 í morgun og er hann einn sá stærsti í hrinunni. Magnús Tumi segir að staðan eftir þann skjálfta verði betur metin á fundi vísindaráðs almannavarna í hádeginu.
Magnús Tumi segir að kvikugangurinn hafi færst suður á síðustu dögum en færslan virðist þó ekki hafa verið mikil síðastliðinn sólarhring.
Samkvæmt hraunflæðilíkani Veðurstofunnar frá því í gær er sprunga staðsett þar sem kvikugangurinn er upp af Nátthaga við Fagradalsfjall.
„Gangurinn hefur verið að mjaka sér til suðurs og það hefur ekkert gerst í norðurhlutanum í nokkra daga. Það þýðir að þá getur meiriparturinn af því hafa storknað núna,“ segir Magnús Tumi. Hann segir að mögulegt eldgos gæti endað eins í syðri hlutanum:
„Það eru tveir möguleikar; að það verði ekki gos eða að það verði gos. Meðan kvikan og gangurinn er að lengjast í suður verðum við að vera viðbúin því að það geti farið að gjósa en það er ekkert víst.“
Magnús Tumi segir mögulegan gosstað að mörgu leyti ekki óheppilegan. Hraun muni þá leita í átt til sjávar en gosið yrði að vera ansi lítið til að það færi ekki yfir Suðurstrandarveginn.
„Síðan myndi það væntanlega fara út í sjó enda er ströndin þarna samfellt hraun.“
Funda með þingflokkum
Ný ríkisstjórn kynnt á morgun
„Tímabil aukinnar eldvirkni“
Skattamál verði líklega „þeirra mesta klemma“
Alvarleg netárás á Wise
Ók á hóp fólks á jólamarkaði: Einn látinn
Bjarni: „Útilokað að þetta geti gengið upp“
Forstjóri bendir á ábyrgð birgja vegna verðhækkana
