Innlent | mbl | 13.3.2021 | 13:35 | Uppfært 15:16

Vonbrigðin „voru beinlínis áþreifanleg“

Páll Matthíasson forstjóri Landspítalans. Mynd úr safni. Ljósmynd/Lögreglan

Um helmingur starfsmanna Landspítalans hefur lokið eða fengið fyrri skammt bólusetningar. Það var því gleðilegt að geta boðað tæplega 2 þúsund starfsmenn í bólusetningu til viðbótar í síðustu viku. Vonbrigðin því mikil þegar henni var frestað.

Þetta skrifar Páll Matthíasson, forstjóri Landspítalans, í forstjórapistli sínum sem birtist á vefsíðu Landspítalans í gær.

Viðbrögð og víðtækar aðgerðir til fyrirmyndar

Þar segir Páll að sérstök varkárni starfsmanns Landspítalans sem greindist með Covid-19 um síðustu helgi, eftir að starfsmaðurinn hafði farið á fjölmenna tónleika í Hörpu, og víðtækar aðgerðir vegna smitsins virðist hafa orðið til þess að „hið bráðsmitandi breska afbrigði dreifðist ekki á hennar viðkvæma vinnustað og raunar ekki heldur í miklu fjölmenni þar sem hún var tónleikagestur.“

Páll segir það hafa verið til fyrirmyndar og þakkar konunni fyrir fyrir að sýna aðgát og vandaða umgengni í samræmi við leiðbeiningar og tilmæli farsóttanefndar.

Frétt af mbl.is

Covid-smitaður á tónleikum í Hörpu

Málin skýrist vonandi í næstu viku

Uppákoman leiði þó hugann að bólusetningum starfsmanna Landspítalans en það sé vel þekkt að bóluefni hafi verið af skornum skammti. Um 3.500 af rúmlega 6 þúsund starfsmönnum Landspítala hafi lokið eða fengið fyrri skammt af bóluefni. Það hafi því verið mikil gleðiefni þegar hægt var að boða tæplega 2 þúsund til viðbótar í bólusetningu.

„Vonbrigðin, þegar ljóst var að fresta yrði bólusetningum í varúðarskyni, voru beinlínis áþreifanleg. Ljóst er að frestunin verður a.m.k. fram í næstu viku, vonandi skýrast málin sem fyrst en auðvitað þarf ávallt að gæta fyllsta öryggis,“ segir Páll í pistlinum.

„Það er ástæða til að nota tækifærið og hrósa okkar frábæra fólki sem skipulagt hefur og staðið að bólusetningunum, það hefur unnið afrek við mjög erfiðar aðstæður,“ segir hann einnig.

Frétt af mbl.is

Stöðva tímabundið notkun bóluefnis AstraZeneca

Hrósar léttleikandi og lausnamiðuðu starfsfólki

Í pistlinum, sem lesa má í heild sinni á vef Landspítalans, fjallar Páll einnig um framtíðarþróun Landspítala í jaðri Vísindaþorpsins í Vatnsmýri, Auðnu tæknitorg og um lausnamiðað og léttleikandi starfsfólk Landspítalans.

„Það má nefnilega ekki gleyma því að þrátt fyrir að faraldurinn hafi falið í sér erfiðar áskoranir og þungbær augnablik þá hefur hann líka kallað fram bestu hliðar okkar allra og þétt raðirnar hjá starfsfólki sem hefur starfað sem órofa heild á þessu tímabili.“