„Algjörlega óþolandi uppákoma“

Á fundi allsherjar- og menntamálanefndar í dag komu fyrir nefndina gestir sem upplýstu nefndarmenn um þá stöðu sem upp er komin vegna misheppnaðrar framkvæmdar samræmdra prófa í liðinni viku. Ákveðið hefur verið að leggja fyrir valkvæð próf, en þau hefjast nú á miðvikudag.

Fyrir nefndina komu meðal annarra menntamálaráðherra, umboðsmaður barna og forstjóri menntamálastofnunar og segir formaður allsherjar- og menntamálanefndar, Páll Magnússon úr Sjálfstæðisflokki, að staðan og atburðarásin öll sé nú skýrari í augum nefndarmanna. 

Hann segir að ástandið sé óviðunandi og að nefndarmenn séu sammála um það.

Páll Magnússon, formaður allsherjar- og menntamálanefndar. mbl.is/Eggert Jóhannesson

„Þessi aðilar útskýrðu sín sjónarmið í þessu og nefndarmenn hafa dýpri skilning á málinu en það kom ekki beint nein niðurstaða úr þessum umræðum, umfram það sem áður hefur komið fram,“ segir Páll og bætir við: 

„En það lá fyrir og liggur enn fyrir að þetta er algjörlega óþolandi uppákoma og það stendur á menntamálaráðuneytið og menntamálastofnun að ráða bót á þessu.“

Keppst um að lýsa yfir óánægju

Ýmsir aðilar hafa tjáð sig um klúðrið með samræmdu prófin. Salvör Nordal, umboðsmaður barna, sagði til dæmis á vef stofnunarinnar að óviðundandi væri að nemendur þreyti próf í rafrænu kerfi sem metið væri ófullnægjandi af skipuleggjendum prófsins sjálfs. 

Frétt af mbl.is

„Algjörlega óviðunandi“

Þá sagði Lilja Alfreðsdóttir, mennta- og menningarmálaráðherra, mbl.is að hún væri ekki sátt við framgang mála og sagði að menntamálastofnun yrði að svara fyrir það hvers vegna engin varaáætlun gekk upp við framkvæmd prófsins. 

Frétt af mbl.is

„Ég er ekki sátt við þetta“

• Blogga um frétt