Frekari rannsóknir tefja bólusetningarákvörðun
Setja bókamerki
Kjartan Hreinn Njálsson, aðstoðarmaður landlæknis, segir frekari rannsóknir vera ástæðu þess að ákvörðun um áframhaldandi bólusetningu með bóluefni AstraZeneca tefst fram til næstu viku.
„Við viljum fara aðeins betur yfir okkar gögn, og ráðfæra okkur nánar við nágrannaþjóðir okkar, sérstaklega Norðurlandaþjóðirnar,“ segir Kjartan við mbl.is.
Mikilvægt sé að bera saman bækur í svona málum, og vill landlæknisembættið taka ákvörðun sem byggist á öllum þeim gögnum sem hægt er að fá um bóluefnið, að hans sögn.
„Við vissum að kollegar okkar á Norðurlöndunum vildu gefa sér aðeins lengri tíma til að fara yfir málið, og við erum sama sinnis.“
Nýtt blóðtappatilfelli hefur áhrif
Frestun ákvörðunarinnar stafar að einhverju leyti af nýrri tilkynningu sem barst Lyfjastofnun um mögulega alvarlega aukaverkun í kjölfar bólusetningar með bóluefni AstraZeneca, segir Kjartan aðspurður, en einstaklingur liggur nú á spítala vegna blóðtappa í lungum og er í lífshættu.
„Allt sem kemur upp í tengslum við bólusetninguna, eins og atvikið í dag, hefur áhrif á þá vinnu sem er í gangi.“ Hann segir það atvik þó ekki hafa haft úrslitaáhrif.
„Þetta er bara önnur breyta sem er tekin inn í dæmið sem við erum að leggja upp.“
Ákvörðun liggi vonandi fyrir um miðja næstu viku
Umfangsmikil vísindavinna er nú fram undan hjá embættinu við yfirferð gagna.
„Við viljum komast að því hversu algengt þetta er í þýðinu almennt og það tekur smá tíma, en auðvitað er allt kapp lagt á að klára þetta sem fyrst,“ segir Kjartan.
Hann gerir ráð fyrir að ákvörðun um áframhaldandi notkun bóluefnisins muni liggja fyrir um miðja næstu viku.
Par flutt á bráðamóttöku eftir árás
Klúr skrif beindust einnig gegn börnum
Telur njósnirnar vega að lýðræðinu á Íslandi
Mjög dýrt að tryggja landamærin
Unnu eftir kröfugerð sem lögð var fram í upphafi
Fresta framkvæmdum við Landspítala
Illviðri gengur yfir landið í dag
Var rétt komin ofan í sprunguna