Ekki svæði fyrir skemmtigöngur

Aðstæður á svæðinu í kringum eldhræringarnar í Geldingadal í Fagradalsfjalli eru alls ekki góðar, að sögn Freys Hákonsonar tökumanns, sem hefur verið á svæðinu í nótt.

„Svæðið er blautt og laust í sér og það er varhugavert yfirferðar fótgangandi og á bifreiðum, þannig að þetta er ekki svæði til að fara í skemmtigöngu á,“ sagði Freyr við K100 í morgun.

Gosið er í Geldingadal við Fagradalsfjall. Eins og sjá má á myndinni lokar dalurinn hraunið nokkuð af en laust er í hlíðum í fjöllunum í kring og ekki öllum hent að vera á ferð um svæðið. Ljósmynd/Landhelgisgæslan

Hann taldi ekki ólíklegt að fólksbílum væri hætt við festast í tilraunum sínum til að ferðast um torfært svæðið.

Hjördís Guðmundsdóttir upplýsingafulltrúi almannavarna leggur í samtali við mbl.is áherslu á að eldgosið sé í óbyggðum á Reykjanesi og að nýleg dæmi séu um að þar lendi í ógöngum jafnvel vanasta fólk. Ekki staður til að fara í labbitúr, segir Hjördís.

Fóru nálægt gosinu

Þeir sem fara um svæðið eru fulltrúar almannavarna og vísindamenn, og blaðamenn í fylgd með þeim. Farið er á sérútbúnum bílum og með allan nauðsynlegan búnað og óviðkomandi aðgangur bannaður.

Freyr fór ásamt öðrum að gossvæðinu í gær og var, að hann telur, um kílómetra frá sprungunni, sem er það næsta sem menn hafa farið gosinu. Þar voru teknar fyrstu myndirnar í návígi af gosinu úr landi.

Eldgosið hófst klukkan 20.45 í gærkvöldi en þess varð fyrst vart rétt tæpri klukkustund fyrir. Hætta stafar af gasmengun af völdum gossins en ekki er talið að það ógni byggð.

Eggert Jóhannesson

• Blogga um frétt