Aðeins hafa rúmlega 200 skjálftar mælst á Reykjanesskaga frá miðnætti í dag. Þótt það sé vissulega mikið er það lítið í samanburði við það sem var áður en fór að gjósa á Reykjanesskaga. Dagana fyrir gos mældust að jafnaði 2-3 þúsund skjálftar á dag og voru þeir langflestir við Fagradalsfjall. Stærsti skjálftinn í dag varð laust eftir klukkan tvö í nótt og var 3,2 að stærð.

Sérfræðingur á Veðurstofu Íslands staðfestir þetta við mbl.is og segir að skjálftum hafi snarfækkað frá því fyrir gos. Staðan á gosinu sjálfu sé óbreytt, engir nýir gígar hafi enn myndast og órói á svæðinu ekki mikill.

Veðrið við gossvæðið hefur farið versnandi með kvöldinu og er þar nú hvassviðri og úrkoma. Enn er spáð leiðindaveðri á svæðinu í nótt og er jafnvel búist við snjókomu og éljagangi.

Almannavarnir hafa ráðið fólki frá því að gera sér ferð að gossvæðinu í Geldingadal í kvöld og nótt vegna versnandi veðurs. 

Frétt af mbl.is

Stórhættulegt að ferðast að gossvæðinu í kvöld

Tengdar fréttir

Eldvirkni á Reykjanesskaga

Engir skjálftar yfir kvikuganginum

• Segir hættustigið forvörn fyrir helgina
• Hættustigi lýst yfir vegna hættu á eldgosi
• Áhyggjuefni ef gos hefst í vondu veðri
• „Nokkur dæmi um hús í óásættanlegu ástandi“

» Fleiri tengdar fréttir

• Blogga um frétt