Innlent | mbl | 26.3.2021 | 20:10

Þrír til viðbótar smitaðir í Norrænu

Norræna kom til Seyðisfjarðar á þriðjudaginn.

Fimm voru greindir með kórónuveirusmit á landamærunum á Seyðisfirði við komu Norrænu á þriðjudag. Þeir voru hluti af tuttugu og fimm manna hópi þar sem tveir greindust smitaðir við komu um borð í Norrænu í Hirtshals í Danmörku.

Frétt af mbl.is

Tveir smitaðir í Norrænu

Þrír bættust í hóp smitaðra við komu. Allir hafa þeir verið í einangrun síðan og ekki talin hætta á að smit berist í samfélagið, að því er segir á facebooksíðu lögreglunnar á Austurlandi.

Samkvæmt upplýsingum aðgerðastjórnar var annar tveggja þeirra sem greindist smitaður í Hirtshals með gamalt smit og því ekki veikur eða smitandi. Aðgerðastjórn gerir ráð fyrir leiðréttingu vegna þessa og að smituðum muni því fækka um einn á Austurlandi þegar nýjar tölur berast á morgun.

Skipið Taurus Confidence.

Ástand skipverja stöðugt

Tíu Covid-smitaðir áhafnarmeðlimir eru um borð í súrálsskipi sem liggur í Mjóeyrarhöfn á Reyðarfirði. Fylgst er mjög skipulega með líðan þeirra í samvinnu Heilbrigðisstofnunar Austurlands (HSA) og Covid-deildar Landspítala. Ekki hefur þurft að flytja neinn þeirra frá borði og ástandið er stöðugt.

Frétt af mbl.is

Smitum ekki fjölgað á súrálsskipi

Alls eru nítján í áhöfn skipsins. Aðrir skipverjar, níu talsins, hafa í tvígang verið skimaðir eftir komu skipsins til Reyðarfjarðar, fyrst á komudegi 20. mars og svo aftur 22. mars. Niðurstöður voru í báðum tilvikum neikvæðar. Þeir verða skimaðir að nýju næstkomandi mánudag, en enginn þeirra sýnir einkenni veikinda.

„Aðgerðastjórn vekur athygli á að mörg smit hafa komið upp á landinu nýverið og sóttvarnir hertar vegna þess. Þá eru smit nú býsna nærri okkur í fjórðungnum þó ekki sé talin hætta á dreifingu þeirra,“ segir í tilkynningunni.

„Staðan sýnir þó glöggt mikilvægi þess að við förum ofurvarlega, ekki síst nú í aðdraganda páska með þeim áskorunum sem þeim fylgja. Gætum því að öllum persónubundnum vörnum sem áréttaðar hafa verið svo oft, tveggja metra reglu, grímunotkun, handþvott og sprittnotkun.“