Innlent | mbl | 29.3.2021 | 11:39 | Uppfært 13:15

Munu rýma gosstöðvarnar á miðnætti

Fjöldi fólks hefur lagt leið sína í Geldingadali. mbl.is/Kristinn Magnússon

Suðurstrandarvegi verður lokað kl. 21 í kvöld, eða fyrr ef aðstæður breytast til hins verra á svæðinu. Svæðið umhverfis gosstöðvarnar verður sömuleiðis rýmt á miðnætti.

Lögreglan á Suðurnesjum tilkynnir þetta og bendir á að við lokunarpóst á veginum muni fólki, hvort sem er á bílum eða gangandi, verða vísað frá, frá klukkan 21.

Athuga ferðir ferðamanna

Um leið biðlar lögreglan til fólks að hefja göngu frá gosstöðvunum niður á þjóðveg tímanlega fyrir miðnætti.

Lögreglan segist einnig munu verða með stöðvunarpóst á Suðurstrandarvegi austan við Grindavík. Þar verði allir stöðvaðir og ferðir ferðamanna athugaðar sérstaklega vegna sóttvarnareglna.

Stefnt sé að því að halda svæðinu opnu næstu daga frá kl. 9 að morgni til kl. 21 á kvöldin.

Forðist að taka með sér hunda

Eftirfarandi leiðbeiningar lætur lögreglan fylgja í tilkynningunni. Er meðal annars bent á að forðast skuli að taka með sér hunda að gosstöðvunum.

Gasmengun við gosstöðvarnar getur alltaf farið yfir hættumörk, mökkurinn leggst undan vindi og því öruggast að horfa til eldgossins með vindinn í bakið.
Í hægviðri (<5 m/s) getur gas safnast fyrir í dalnum, þá stjórnast vindafar af landslagi og gas getur verið yfir hættumörkum langt upp í hlíðar, allan hringinn í kringum gosstöðvarnar. Í slíkum tilfellum þurfa áhorfendur að færa sig upp á fjöll og hryggi en ekki halda sig í brekkunum fyrir ofan.
Velja þarf gönguleið eftir vindaspá hverju sinni.
Forðast skal að taka hunda með sér að gosstöðvunum. Hundar eru berskjaldaðri fyrir mengun vegna gass þar sem þeir eru nær jörðu. Einnig getur flúor leynst í pollum sem hundar drekka úr.
Veðurstofan hefur sett upp veðurstöð við gosstöðvarnar sem sýnir athuganir á klukkustundar fresti.
Hér eru ráðleggingar frá Umhverfisstofnun vegna mengunar frá gosstöðvum og hlekkur á loftgaedi.is sem sýnir stöðu á loftgæðum í byggð.
Ábending til foreldra að taka ekki lítil börn með sér á svæðið en landið er nokkuð erfitt yfirferðar og eins með hliðsjón af gasmengun við eldstöðvarnar.
Vegna hálku á gönguleið er fólki ráðlagt að taka göngubrodda með. Klæða sig vel en strigaskór til að mynda henta engan veginn við aðstæður sem þarna eru.
Hafið meðferðis andlitsgrímur og sprittbrúsa og gætið að nálægðarmörkum vegna Covid-19.
Í dag er útlit fyrir norðan og síðar norðaustan 8-13 m/s og leggur mengun þá til suðurs og suðsuðvesturs frá gosinu og þá ekki yfir byggð.