„Það er fínt rennsli og alveg passleg mæting, við getum orðað það þannig,“ segir Bogi Adolfsson, formaður björgunarsveitarinnar Þorbjarnar í Grindavík, í samtali við mbl.is síðdegis þennan þrettánda dag goss í Geldingadölum.

Mikil aðsókn var á gosstöðvarnar í gær, svo mikil raunar að Suðurstrandarvegur fylltist af bílum allt frá Ísólfsskála og vestur til Grindavíkur. 

Lög­regl­an greindi frá því í morg­un að í ljósi reynslu síðustu daga verði lokað fyr­ir alla um­ferð að gosstöðvum kl. 18, eða fyrr ef nauðsyn kref­ur. Viðbragðsaðilar muni svo hefja rým­ingu á gossvæði kl. 22. Til og með 5. apríl verði opnað fyr­ir um­ferð kl. 6 að morgni.

Spurður hvort von sé á aukinni umferð nú undir lok vinnudags segist Bogi smeykur um það.

„Það gæti orðið einhver smá viðbót þar. Maður veit aldrei. Þetta byrjaði líka svona í gær, ef ég man rétt.“

Bogi Adolfsson, formaður Þorbjarnar. mbl.is/Sigurður Bogi

Mjög þakklát

Fjöldi björgunarsveita hefur lagt leið sína á Reykjanesskaga til að veita Þorbirni liðsinni. 

„Það er Vopnafjörður ...“ segir Bogi en afræður að best sé að sleppa allri upptalningunni. „Ég held bara að fólk sé hreinlega búið að skrá sig af öllu landinu. Við erum mjög þakklát fyrir það.“

Björgunarsveitarfólk hefur enda fundið mjög fyrir álaginu sem fylgir aðsókn fólks sem þyrstir í að sjá gosið eigin augum. Og Grindvíkingar sömuleiðis. Bæjarbúar komust margir ekki leiðar sinnar innanbæjar í gær vegna bílafjöldans úr borginni.

„Ég vona að það verði bara ekki aftur,“ segir Bogi.

Þá má ekki gleyma að björgunarsveitarfólk í Grindavík hefur líka öðrum hnöppum að hneppa en að gæta öryggis fólks við gosstöðvarnar.

„Við höfum reynt að rótera þessu. Sumir eru í vinnu og sumir í skóla, þetta er misjafnt.“

Tengdar fréttir

Eldvirkni á Reykjanesskaga

Engir skjálftar yfir kvikuganginum

• Segir hættustigið forvörn fyrir helgina
• Hættustigi lýst yfir vegna hættu á eldgosi
• Áhyggjuefni ef gos hefst í vondu veðri
• „Nokkur dæmi um hús í óásættanlegu ástandi“

» Fleiri tengdar fréttir

• Blogga um frétt