„Í nótt myndaðist dálítil lægð“

Í nótt myndaðist dálítil lægð á Grænlandshafi og þokast hún austur á bóginn í dag og dýpkar. Úrkomusvæði lægðarinnar nálgast landið og gengur í vestankalda með snjókomu eða slyddu á vesturhelmingi landsins eftir hádegi. Þetta kemur fram á vef Veðurstofu Íslands.

„Vestlægari vindar og bjartviðri eystra, en talsvert frost. Hlýnar smám saman í veðri og víða kringum frostmark er líður á daginn.

Í fyrramálið er lægðin komin skammt út af Faxaflóa og ríkja því austan- og suðaustanáttir á landinu með rigningu eða slyddu í flestum landshlutum. Á mánudag dregur heldur úr vindi og rofar til, en eimir áfram eftir af vætunni suðaustan til,“ segir í hugleiðingum veðurfræðings á Veðurstofu Íslands.

Veðurhorfur í dag og næstu daga

Hæg breytileg átt, víða léttskýjað og talsvert frost í fyrstu, en þykknar síðan upp á V-verðu landinu og hlýnar. Suðvestan 5-10 m/s, snjókoma eða slydda með köflum þar síðdegis, en hægara og léttskýjað eystra. Hiti kringum frostmark eftir hádegi, en frost 0 til 5 stig NA-lands.

Austan og suðaustan 8-13 m/s og rigning eða slydda öðru hvoru á morgun, en úrkomulítið NA-lands. Norðaustan 10-15 á Vestfjörðum undir kvöld. Hiti 0 til 6 stig.

Á sunnudag:

Austlæg átt, víða 5-13 m/s en norðaustan 13-15 á Vestfjörðum. Slydda eða snjókoma með köflum og rigning við S-ströndina, en úrkomuminna um kvöldið. Hiti nærri frostmarki.

Á mánudag:
Austlæg átt, 3-10 m/s og léttskýjað, en 8-13 og dálítil él SA-lands. Hiti 0 til 6 stig að deginum, mildast syðst.

Á þriðjudag:
Norðaustan 8-15 m/s og snjókoma með köflum eða él og kólnandi veður, hvassast NV-til.

Á miðvikudag:
Ákveðin suðvestlæg átt með rigningu eða slyddu og hlýnandi veður, en lengst af þurrt fyrir austan.

Á fimmtudag og föstudag:
Breytilegar áttir og rigning eða snjókoma víða um land.