Hægt að panta stafrænt kynferðisbrot gegn barni

Hægt er að panta stafrænt kynferðisbrot gegn tilteknu barni og að það sé framið af ákveðnum aðila. Áskriftir að slíkum brotum eru síðan seldar á huldunetinu.

„Við skulum ekki halda það að Íslendingar séu ekki á meðal þeirra sem taka þátt í slíkum brotum,“ sagði Karl Steinar Valsson, yfirlögregluþjónn alþjóðasviðs ríkislögreglustjóra, á fundi ríkislögreglustjóra vegna stafræns kynferðisofbeldis gegn börnum.

Frétt af mbl.is

Viðamiklar aðgerðir gegn stafrænu ofbeldi

Hann sagði aukningu vera í stafrænu kynferðisofbeldi gegn börnum í öllum Evrópulöndum og að verulegar líkur séu á því að brotin séu vantilkynnt. Að mati Europol eru brot sem þessi ein mesta ógnunin gegn okkar gildum og hefur mikil áhersla verið lögð á að berjast gegn þeim.

Oft er verið að glíma við skipulagða brotahópa í þessum málum. Samkvæmt nýjustu skýrslu Europol eru um 25% þekktra brotahópa virkir í 10 ár eða lengur og 7 af hverjum 10 eru virkir í mörgum löndum. Málin eru því alþjóðleg og þess vegna er alþjóðleg samvinna lykilatriði, að mati Karls Steinars.

Frá fundinum í dag. Karl Steinar er lengst til hægri á myndinni. mbl.is/Kristinn Magnússon

Óvenjumargir undir 17 ára

Hann vitnaði í könnun Helga Gunnlaugssonar, afbrotafræðings og prófessors við Háskóla Íslands, og Jónasar Orra Jónassonar frá síðasta ári um að 1 af hverjum 5 hafi orðið fyrir broti á netinu, þar af hafa um 20% orðið fyrir kynferðislegri áreitni og 17% orðið fyrir því að myndum af þeim er dreift án þeirra samþykkis. 5% í viðbót hafa fengið slíka hótun.

Frétt af mbl.is

Átta ára börn fá kynferðislegar myndir

Karl Steinar sagði óvenjuhátt hlutfall gerenda og þolenda vera yngri en 17 ára. Sakborningar eru um 21% í þessum aldurshópi og brotaþolar um 34%. Karlar eru 85% sakborninga og konur 85% brotaþola. Séu konur sakborningar er tæpur helmingur þeirra 17 ára og yngri og eru þessar tölur sambærilegar við önnur lönd.

Áslaug Arna Sigurbjörnsdóttir dómsmálaráðherra og Ásmundur Einar Daðason, félags- og barnamálaráðherra, á fundinum í dag. mbl.is/Kristinn Magnússon

Samstarf við Dani

Ísland hefur tekið þátt í að finna framleiðendur og framleiðslustaði barnaníðsefnis. Tvö íslensk mál hafa verið sett í gagnagrunn Interpol sem framlag lögreglunnar í alþjóðlegri baráttu gegn brotum gagnvart börnum. Einnig eru skoðaðar sambærilegar aðgerðir í gegnum gagnagrunn Europol. Á síðasta ári fékk lögreglan á höfuðborgarsvæðinu aðgengi að dönskum gagnagrunni varðandi aðgengi að barnaníðsefni. Um 100 þúsund myndir og myndbönd eru í grunninum. Tilgangurinn með samstarfinu er að lögreglan hér á landi búi til sinn eigin gagnagrunn og flýti þannig fyrir tæknilegum hlutum rannsókna sinna.

Sigríður Björk Guðjónsdóttir ríkislögreglustjóri. mbl.is/Kristinn Magnússon

Samhliða þessu hefur lögreglan fengið aðstoð frá Dönum við að fylgjast með niðurhali á barnaníðsefni til Íslands á ákveðnum tímum á síðasta ári. Það hefur skilað sér í því að þó nokkur mál hafa komið til rannsókna og eru þar enn.

• Blogga um frétt