Býst við að tekin verði skýrsla af Sölva

Kristrún Elsa Harðardóttir, lögmaður tveggja kvenna sem sakað hafa fjölmiðlamanninn Sölva Tryggvason um ofbeldi, býst við því að tekin verði skýrsla af Sölva á næstu vikum í tengslum við annað málanna.

Kristrún og skjólstæðingur hennar hafa fengið boð í skýrslutöku hjá lögreglu vegna málsins, eftir að Kristrún lagði fram beiðni þess efnis til þess að leggja fram kæru.

Fer skýrslutakan fram á næstu vikum, að því er Kristrún tjáir mbl.is.

Kristrún Elsa Harðardóttir, lögmaður kvennanna. Ljósmynd/Rósa Braga

Fleiri konur ekki leitað til Kristrúnar

Málið varðar konu sem kveðst hafa orðið fyrir kynferðisbroti af hálfu Sölva á heimili hans 22. júní í fyrra og kveðst loks nú hafa hugrekki til að kæra brotið til lögreglu, samkvæmt yfirlýsingu sem Kristrún sendi frá sér í síðustu viku.

Spurð hvort Sölvi verði yfirheyrður í kjölfar skýrslutöku af skjólstæðingnum segir hún:

„Lögreglan verður að svara fyrir það en það er nú yfirleitt þannig.“

Sölvi var þá einnig sakaður um líkamsárás í marsmánuði. Kristrún segir að það mál sé enn til rannsóknar hjá lögreglu en Kristrún er einnig lögmaður konunnar sem þar á í hlut.

Fleiri konur hafa ekki leitað til Kristrúnar með sambærileg mál á hendur Sölva.

Frétt af mbl.is

Tvær konur stíga fram og saka Sölva um ofbeldi

• Blogga um frétt