Ræða við Krónuna og Samkaup um verslun í Vogum

Sveitarfélagið Vogar hefur fest kaup á verslunarhúsnæði í bænum og leitar nú að áhugasömum rekstraraðilum. Verslunin í Vogum var starfrækt í þessu sama húsnæði en hún lokaði fyrr á þessu ári. Húsið telur tæpa 140 fermetra en sjálfsafgreiðslustöð N1 er staðsett á sömu lóð.

Að sögn Ásgeirs Eiríkssonar, bæjarstjóra Voga, eru viðræður hafnar við nokkra aðila. Meðal þeirra eru Krónan sem rekur dagvöruverslanir undir eigin nafni en einnig verslanirnar Kr. í Vík og Þorlákshöfn. Þá eru viðræður hafnar við Samkaup sem rekur verslanirnar Nettó, Kjörbúðina, Krambúðina og Iceland.

Ásgeir segir það mikilvægt fyrir bæjarbúa að geta keypt dagvöru í nærumhverfi sínu. Sem stendur er enginn söluaðili í bænum og því sé það hlutverk sveitarfélagsins að liðka fyrir slíkum rekstri. Þá segir hann verslun innan bæjarmarka til þess fallna að fækka akstursferðum Vogamanna og minnka þannig kolefnisspor sveitarfélagsins.

• Blogga um frétt