Bjartsýnn á afléttingar í Skagafirði

Þórólfur Guðnason sóttvarnalæknir segir útlit fyrir að búið sé að ná tökum á hópsmiti sem kom upp í Skagafirði fyrir rúmri viku. Hann er bjartsýnn á að hægt verði að aflétta sérstökum takmörkunum sem gilt hafa í héraðinu síðan á mánudag.

Frétt af mbl.is

Stefnt að afléttingu eftir helgi

Tvö kórónuveirusmit greindust innanlands í gær og voru báðir hinna smituðu í sóttkví við greiningu. Annar þeirra var í Skagafirði og er fjöldi smita á svæðinu síðustu rúmu viku nú orðinn 15. Einn þeirra tekur út einangrun sína utan heimabyggðar og uppgefin tala  almannavarna um fjölda í einangrun á Sauðárkróki er því 14.

Skólar og margar verslanir og stofnanir á Sauðárkróki hafa verið lokuð síðan á mánudag, sem og sundlaugar í Skagafirði, en þann sama dag tók gildi tilslökun á sóttvarnaaðgerðum á landsvísu sem ekki gilti um Sveitarfélagið Skagafjörð og Akrahrepp.

Frétt af mbl.is

Sundlaugum, skólum og verslunum lokað

„Það hefur verið brugðist mjög hratt og vel við, og þeir sem hafa verið að greinast undanfarið hafa verið í sóttkví. Ég vona að það sé búið að ná tökum á þessu rétt eins og tókst í Ölfusi og á fleiri stöðum,“ segir Þórólfur.

• Blogga um frétt