Ábyrgðarmaður lagði Menntasjóð í fordæmisgefandi máli

Ábyrgðarmaður að láni frá Menntasjóði (áður LÍN) var sýknaður í héraðsdómi af kröfu um greiðslu lánsins sem nam 7 milljónum króna auk dráttarvaxta. Hefur þetta mikla þýðingu fyrir þá 1.211 ábyrgðarmenn sem eru í sambærilegri stöðu.

Menntasjóður hafði túlkað vanskil með þeim hætti að allt lánið teldist í vanskilum ef hluti þess, jafnvel ekki meira en ein afborgun, var í vanskilum.

Er nú ljóst að ábyrgðarmenn beri aðeins ábyrgð á þeim hluta sem var í vanskilum við gildistöku laganna en ekki láninu öllu eins og Menntasjóður hélt fram.

Frétt af mbl.is

Rúmlega 1.200 bera enn ábyrgð

Þegar nýju lögin tóku gildi voru tveir gjalddagar á láninu í vanskilum. Greiddi viðkomandi það en krafðist sýknu af eftirstöðvunum og var fallist á það í héraðsdómi í dag. 

Rúm­lega 29 þúsund ábyrgðir ábyrgðamanna á náms­lán­um sem tek­in voru fyr­ir mitt ár 2009 voru felld­ar niður í kjöl­far gildis­töku laga um Mennta­sjóð náms­manna í sum­ar. Eft­ir stóðu þó 1.211 ein­stak­ling­ar sem enn eru í ábyrgðum fyr­ir lán­tak­end­ur. Helg­ast það af því að lán­tak­end­ur voru ekki í skil­um þegar lög­in tóku gildi.  

Vilhjálmur Þ. Á. Vilhjálmsson, hæstaréttarlögmaður á Lögfræðistofu Reykjavíkur, fór með málið fyrir hönd ábyrgðarmannsins. Hann segir þetta afdrifaríkan dóm þar sem nú séu aðrir 1.211 einstaklingar sem geta leitað réttar síns eftir að hafa ranglega fengið á sig fellda ábyrgð. Þessir ábyrgðarmenn geta nú losnað við ábyrgðina með því að greiða einungis það sem var í vanskilum við gildistöku laganna.

• Blogga um frétt