Hættusvæði vegna gróðurelda stækkað

Hættusvæði vegna gróðurelda hefur verið stækkað og nær nú yfir allt vestanvert landið auk Austur-Skaftafellssýslu. Þetta kemur fram í tilkynningu frá almannavörnum.

Lítil úrkoma hefur verið víða um land síðustu daga og vikur og áfram er þurrkatíð í kortum. Þá hefur næturkuldi ekki hjálpað til.

Í hættustigi felst meðal annars að bannað er að kveikja opinn eld. Sumarhúsaeigendur í grónu landi eru enn fremur hvattir til að vera undir það búnir að ráða við minniháttar eld þar sem hver sekúnda getur skipt máli.

Almannavarnir beina eftirfarandi tilmælum til almennings:

• Ekki kveikja eld, hvorki innan- né utandyra
• Ekki nota einnota grill
• Ekki nota venjuleg grill þar sem gróður er þéttur
• Huga vel að brunavörnum og gera flóttaáætlun
• Kanna flóttaleiðir við sumarhús
• Ekki vinna með verkfæri sem hitna mikið eða valda neista
• Fjarlægja eldfim efni við hús og huga að staðsetningu gaskúta
• Bleyta í gróðri í kringum hús þar sem þurrt er

Verði fólk vart gróðurelda á að hringja strax í neyðarlínuna, í síma 112.

• Blogga um frétt