Heilmikil hrauná opnaðist rétt aftan við eystri varnargarðinn á Fagradalsfjalli um hádegisbil í dag. Ljóst er að farvegir neðanjarðar eru að veita bráð að jaðri hraunbreiðunnar úr tjörninni ofar í hrauninu.

Þetta kemur fram í facebookfærslu eldfjalla- og náttúruvárhóps Suðurlands.

„Meginhraunáin úr gígnum liggur til austurs úr Geldingadölum yfir í nafnlausa dalinn. Hraunáin liggur þar mun hærra uppi en hraunjaðarinn við varnargarðana. Því er ljóst að hraunjaðarinn mun einungis halda áfram að þykkna og skríða fram á við á meðan þær aðstæður eru fyrir hendi,“ segir í færslunni.

„Svona undanhlaup eins og nú eru í gangi koma því ekki á óvart. Þegar spólað er til baka í vefmyndavél RÚV má greinilega sjá hvernig hraunjaðarinn við varnargarðinn lyftist upp nú fyrir hádegi, áður en hraunbráðin braut sér loks leið út úr jaðrinum.“

Hraunið liggur upp að varnargarðinum. mbl.is/Kristinn Magnússon

Uppfært kl. 13:44

Að sögn Boga Adolfssonar, formanns björgunarsveitarinnar Þorbjarnar, stafar engin hætta af hraunánni og hefur hún engin áhrif á vinnu á svæðinu.

„Mér skilst að þetta sé ekki neitt sem við þurfum að hafa áhyggjur af eins og er. Garðarnir halda og allt slíkt. Þótt maður viti ekki allt sem gerist á hverju augnabliki þá er alltaf fylgst með öllu,“ segir Bogi í samtali við blaðamann mbl.is.