Ef spár Íslandsbanka ganga eftir mun verð íbúðarhúsnæðis hækka um tæp 25% frá ársbyrjun 2021 til ársloka 2023. Þetta kemur fram í uppfærðri hagspá bankans sem birt er í dag.

Jón Bjarki Bentsson, aðalhagfræðingur Íslandsbanka segir spána gera ráð fyrir 11,3% hækkun á þessu ári og að í því felist engin ofrausn. „Rúmur helmingur þeirrar hækkunar er nú þegar kominn fram og fátt sem bendir til þess að dragi úr spennunni á næstu fjórðungum.“

Hins vegar muni hækkunin verða 6,7% árið 2022 og 4,4% árið 2023.

„Við teljum að framboð á íbúðarhúsnæði muni aukast eftir því sem líður á spátímann og að þá muni vaxtahækkanir Seðlabankans einnig slá á hækkunarferlið,“ segir Jón Bjarki, í ViðskiptaMogganum í dag.

Bendir bankinn á að framboð á íbúðarhúsnæði, einkum á höfuðborgarsvæðinu, hafi ekki fylgt hinni miklu eftirspurn og að íbúðatalning Samtaka iðnaðarins bendi til að íbúðum í byggingu hafi fækkað verulega þegar kórónufaraldurinn skall á.

„Það má því segja að eftirspurnarspenna ríki á markaðnum. Það sem einnig ýtir verðinu upp er sá mikli ófyrirsjáanleiki með þróun markaðarins, þ.e. framboðið fram undan,“ segir Jón Bjarki og bendir á að hagsmunaaðilar, sveitarfélög, SI, fjármögnunaraðilar og eftir atvikum ríkið þyrftu að auka gagnaöflun, samráð og gagnsæi varðandi fasteignamarkaðinn.

Spá Íslandsbanka í heild

Tengdar fréttir

Húsnæðismarkaðurinn

Verkalýðshreyfingin pólitísk í eðli sínu

• Húsbyggjendur fái hlutdeildarlán
• Dýrara að byggja á þéttingarreitunum
• Græddi á láninu
• Atvinnu-AirBnb „ígildi þess að reka gistiheimili“

» Fleiri tengdar fréttir